Pak thlawhna lei tum India tan hlauhawm theiah ngai

Pak thlawhna lei tum India tan hlauhawm theiah ngai
November, 2024-a China-in a tlangzarh, J-35 indo thlawhna chu India hmelma kumhlun, Pakistan chuan a nei ve dawn a, mi thiamte chuan Delhi tan buaipui tham leh hlauhawm a ni thei dawn niin an ngai.
Khawvela indo thlawhna tha bera chhal mek, US-in a siam leh a hman, F-35 nena khaikhin hlawh phak indo thlawhna hi 5th generation stealth fighter an tih ang chi a ni a, India hian stealth fighter a la neih ve miau loh avangin a chungnung sa nghal.
Islamabad hian a taka a neih hunah chuan indo thlawhna chhuan thar berah pawh a thenawm ram neih loh a nei dawn tihna a ni a, van boruaka inepnaah Delhi hian a umpha dawn lo.
J-35 hi a theihna zawng zawng hriat kim a la nih loh avangin ‘black box’ tiin an sawi mai thin a, enchhinna velah erawh US chhuanvawr, F-35 ang vel niin a aia tha zawk nia sawi pawh an awm a; a ni ngei tih fiah turin indonaah a la chetla ve lo thung.
August, 2024-a a hmelhmang pho chhuah tawh china a lan an chuan J-35 hi pianhmangah chuan FC-31 nen a inang deuh reng a. Chi hnih a awm a, pakhat hi lawng sipaite hman chi niin pakhat erawh khawmual sipaite hman chi leh ram dangah pawh an hralh chhuah theih tura an duan a ni.
Pakistan hian a hnuhnung zawk ang hi an nei dawn nia ngaih a ni a, hei hian a hnar (a hma chhip zumah) infrared search-and-track a nei.
China Daily-in a tar lan dan chuan ralthuam dang hmangtute hnenah bitum tur ‘a hlanchhawng thei’ a, khawmual atanga boruaka mi kahna chi missile-te hnenah a hrilh thei a, hei bakah hian a radar hmangin ralthuam dang atanga kah chhuahte a kaihruai thei bawk.
India tana hlauhawm ber erawh stealth a ni hi a ni a. J-35 hian radar cross-section 0.001sq m a nei a, hei hi F-35-in a neih ang niin Pakistan hian a neih hunah chuan indonaah India tan hmuh a harsa hle dawn a. Ramria inbeihna a awmin hmu turin rei tak a beih a ngai dawn tihna a ni.
Ralthuam leh indona thil hriate chuan India tana hlauhawm ber chu ramria a ep reng ram pahnih, China leh Pakistanin stealth fighter an nei ve ve tur chu a ni a, India-in a boruak a venhimna chu a derthawng nghal hle dawn niin an ngai.
Hetiang hi thil awm dan a nih mek avangin Delhi hian a thenawm ramte nena an inkar tizim tura a air defence system neih sate a tihchangtlun leh siam ve emaw, thil dang hmanga 5th generation indo thlawhna a neih thuai a ngai niin an ngai a ni.
Pakistan leh China hi ralthuamah an inpuiin an inleitir nasa a. Tunah hian Islamabad sipaite hian Chinese indo thlawhna dang, J-10C leh JF-17 chu 20 vel a nei sa mek.
J-35 indo thlawhna pawh hi Beijing atanga 40 lei turin Pakistan hian inremna a siampui tawh a, heng zinga a hmasaho chu kuminah an dawn hman beisei a ni a, stealth fighter jet nei ram zinga chhiar tel a nih theih nan nawr pawh a nawr hmanhmawh hle nia sawi a ni.
Pakistan kut a thlen hunah chuan tuna an hman rim tak, FC-31 chu hnawlin India neih loh stealth hmangin a hmachhawn thei tawh dawn.
J-35 hi China-in 5th generation stealth fighter a siam pahnihna niin engine pahnih hmang, pakhat chauh chuan theihna supersonic jet a ni a, indona mual hrang hranga chhawr theih tur a ni.
Van sanga indona hmanraw tha ber bera thuam a ni a. Electronically scanned array, electro-optical targeting system leh infrared search-and-track a nei.
Chinese sorkar chanchinbu, The Global Times chuan J-35 hi khawvela indo thlawhna man to ber, US ta, F-35 nen a stealth leh counter-stealth combat framework el phaa chhuahin hmelma thlawhna tihchhiatna kawngah a chungnung zawk hial niin a tar lang.
India hian 5th generation stealth fighter a la nei ve lo va, hmasawn tuma bei mekin thla hmasa khan Advanced Medium Combat Aircraft (AMCA) programme chu Defence Minister Rajnath Singh-a’n a pawm.
AMCA thlawhna hi kum 2035 hma chuan a hman theih erawh a rinawm chiah loh thung.
A thlawhna thar tur a hman theih hma zawng hi chuan India tan chuan thlawhnaa indona chu thil huphurhawm a ni rih dawn niin mi thiamten an sawi.
Indian Air Force hian Pakistan hi thlawhnaah tlan khalh a tum reng a, Delhi-in French siam, Rafale a lei chhan ber pawh a ni.
India hian thlawhna thar siam a tum bakah hian a dang lei pawh a rilruk reng a, heng zingah hian F-35 leh Su-57 pawh a tel.
Hetih lai hian indo thlawhna khalh thin, Group Captain Ajay Ahlawat (retd.) chuan lei chu duhthlanna tha lo nia a ngaih thu a sawi a. “AMCA neih zawk hi a tha,” a ti a, a hma thei ang bera ramin neih a tum hi puitlin a ngai tih a sawi.