Pakhatnain phone a nei ve ta

HSSLC result, tun hnaia chhuaka Science stream-a pakhatna khan phone a nei lo char char a, tunah chuan a nei ve ta – pawl 12 a pass tawh tlat a!
Pawl 12 (Science)-a pakhatna Cynthia Lalhlupuii Shangpliang hi a nu leh pain pawl 12 a pass hma chu phone neih an phal lo a, tunah chuan a pass tak avangin phone a nei ve tawh. Amah chauh ni lovin a ute pawhin pawl 12 an pass hnuah phone an nei chauh.
Cynthia-i hian high school a kal laiin mobile phone a awt ve thin tih a sawi a, “Class 10 hma lamah khan ka awt ve thin a, chumi hnuah chuan ka awt tawh lo,” tiin, “|hiante’n an neih vang khan ka awt ve thin a,” a ti.
Mobile phone a nei lo a, internet chu a khawih; laptop hmangin a khawih a, coaching class kal nan, online class kal nan a hmang thin. Internet hi hmang tangkai a inti a, a lehkhazirna hmanraw pawimawh a nih thu a sawi.
Lehkhabu chhiar nasa a ni a, high school a kal lai pawha lehkhabu atchilh tia sawi ngam a ni tawh.
Christian writer lar CS Lewis-a lehkhabu a chhiar nasa a, “Pilgrim’s Progress” (Kristian Vanram Kawng Zawh) te, theologian lar John Piper-a lehkhabu te a chhiar a, detective lam pawh a chhiar. A chi hrang hrang a chhiar a, a chhiar ngun ber chu Bible a ni.
Bible hi a chhiar chhuak fo tawh a, ngaihnawm pawh a ti. A indawt thlap thlap lova chhiar a ching a, a duh lai a keu kual thin.
Lehkhabu a ngaina hi a lawm a, a lehkhabu chhiar hi kawng hrang hrangin a hlawkpui tih a sawi. A sawi danin, tawng lamah a hma a sawn phah a, thil ngaihtuah thiam turin lehkhabu hian min pui a ti. Mihringin thil eng emaw kan hmu a, thil eng emaw kan han tawng a, lehkhabu chhiar thin chuan chutiang thilah te chuan hlawkpui tur an hmu thin tih chu a ngaihdan a ni.
Cynthia-i hi MBSE buatsaih HSLC examah nikum hmasa khan pakhatna a lo ni tawh a, HSSLC-ah pakhatna a ni leh.