Cricket a inelna lian T20 World Cup 2016 khelh mekah Inrinni khan Super 8 – Group 2 te an inkhel zo va, semi-final lut zo lovin Pakistan an tla.
Semi-final lut thei tura chak mamawh Pakistan hian an thenawm ram Sri Lanka an hmachhawn a, run ngain hnehna chang bawk mah se semi-final luh nan a tawk zo lo. Net run rate-ah New Zealand an tluk loh vangin Pakistan hi uiawm takin an tla.
Sri Lanka lakah run 147 china chak mamawh Pakistan hian inkhel pawimawh takah an vaw hmasa a, over 20-ah mi pariat out chungin run 212 an siam. Pakistan tan ian Farhan chuan ball 60 a hmachhawn atangin century a siam a, a chetha hle. Farhan bakah hian Fakhar chuan ball 42 a hmachhawn atangin run 84 zet a siam ve bawk.
Sri Lanka vuak hun a thleng a, Pakistan run siam khum ngei tumin tan an khawh. Sri Lanka tan hian Shanaka chuan ball 31 a hmachhawn atangin run 76 a siam a, out lovin a ding tluan. Shanaka chetha viau mah se thlawptu a nei tha tawk lo thung a, over 20 chhungin run 207 an siam a, an khingpui Pakistan lakah run 5 in an tlawm a, Group 2-ah table mawngphah luah chungin an tla.
Chak an mamawhna inkhelah chak bawk mah se Pakistan in New Zealand chu nei run rate-ah an phak lova, uiawm takin semi-final an lut zo lo. New Zealand hian net run rate +1.390 an nei a, Pakistan hian net run rate -0.123 an nei ve thung. Sri Lanka lakah hian run 147 talin chak se semi-final lut zawk tur an ni a. Mah se run nga leka an chak vangin an tla zui ta a ni.
Group 2-ah hian vawi thum chak England chu group champion ni chungin semi-final an lut a. Pakistan chungah awmin New Zealand an tlang a, Pakistan leh Sri Lanka an tla ve thung.
Pakistan an tla fel
