Pakistani navy-in Arabian Sea-ah ruihhlo $ tld 1 man man

Pakistani navy-in Arabian Sea-ah ruihhlo $ tld 1 man man
Saudi Arabia kaihhruaia Combined Maritime Forces (CMF) hnuaia hna thawk Pakistani lawng sipaite chuan Arabian Sea-a kal lawng pahnih atangin ruihhlo $ tluklehdingawn 1 man dawn an man.
Ram hrang hrang tangrual lawng sipai tuipuia beihpui thlaktu, CMF hian Nilaini khan thuchhuah siamin kar hmasa tawhah khan Pakistani navy hian darkar 48 chhungin beihpui an thlaknaah lawng rinhlelhawm pahnih an nangching a, an en fiahnaah $ maktduai 972 chuang man ruihhlo an hai chhuak niin an tar lang.
Lawng an man hmasak zawk hi Inrinni kal taa an man niin crystal methamphetamine (ICE) tonne hnih chuang, ‘tual chhunga hralhnaa $ 82,24,00,000 chuang man’ hai chhuah a ni tih CMF thuchhuahah hian tar lan a ni.
“A hnu darkar 48 pawh tling lovah lawng dang nangching lehin ICE kg 350-a rit, $14,00,00,000 man leh cocaine kg 50-a rit, $1,00,00,000 man an man leh bawk a ni,” an ti.
CMF hian ruihhlo an manna lawngte hi khawi atanga zin chhuak nge tih an sawi lo va, tute nge an nih erawh an hriat vek tawh thu an sawi a, an ram erawh an sawi lo thung.
Pakistani lawng sipaiten beihpui an thlak hi Saudi Arabia kaihhruaia kalpui mek, CMF hnuaia kalpui niin sipai 150 an thawk chhuak a, ‘he beihpui thlak hlawhtlinna hian ram hrang hrang thawhhona thatna leh hlawkna a pho lang a ni’ tih an thuchhuahah hian an tar lang.
‘CMF-in ruihhlo a man tawha a man tam ber zinga mi’ a nih thu Saudi Arabian navy-a Commodore Fahad Aljoiad-a chuan a sawi bawk a, ani hi CMF task force-a an commander a ni nghal bawk.
CMF hi ram 47-a lawng sipaite tangruala tuipui mek kil li bial maktaduai 3.2-a thil tha lo leh dan bawhchhiatna thleng thei veng tura thawhhona a ni a. An tuipui ven zingah hian khawvela lawng kawng pawimawh ber ber te, tuipuia ruihhlo leh phal loh dang tawlh te pawh a tel.
Pakistani navy-in an thil man chungchanga thuchhuah hran an siamah an hlawhtlinna chuan ‘an chhehvel tuipui himna tur te, khawvel muanawm a awm theihna tur leh dan lova tuipuia thil tih danchan tuma an thawhnaa an inpekna a tar lang’ tih an sawi.