Mizoram Wrestling Association (MWA) leh LPS Vision ten an buatsaih tur, Mizo Inchai Pui (Mizo Inchai Title Fight) 2026 chungchanga hmalakna sawihona chu July ni 13, Thawhlehni khan LPS Vision Production Director, Pu Lalsawmliana Pachuau chamber-ah neih a ni a, ruahmanna hrang hrang sawi ho a ni.
He hunah hian LPS Director Pu Lalsawmliana chuan, Mizote ngaihhlut Mizo inchai chu tunlaina nen inhnerem chungin, mipuiin engti zawng pawha an ngaihvena, nasa zawka an ngaihhlut leh hmuhnawm an tih theih ang bera chhawpchhuah a nih tur thu a sawi. LPS lamin theih tawp a chhuah dawn a, chutiang bawkin MWA lam pawhin Mizo thalai, inchai chakte, mipui hmuhnawm leh ngaihhlut theih dan tur ang bera inbuatsaih turin a ngen bawk.
Mizoram Wrestling Association (MWA) President Ngurthansanga pawhin, sum harsatna thleng mekah, mahni insenso pawh huama Mizo thalaite infiamna lama hmalatu LPS Vision chungah lawmthu sawiin, Mizo inchai Title Fight 2026 hmachhawn turin nasa takin inchai chakte an inbuatsaih mek thu a sawi a. Kum dang zawng aiin Mizo inchai Title Fight inlan turte an taksa a fit tha dawn a. Inchai hmuhnawm leh ngaihven hlawh tak a nih tur thu a sawi lang bawk.
Mizote ngaihhlut, Mizo Inchai Title Fight 2026 chu kumin October thla tawp hian LPS Arena, Falkland-ah neih a ni dawn a. He hunah hian Mizo thalai Inchai chak mi 12 inlan tur niin, freestyle wrestling (exhibition match) khel tur mi 24 an awm bawk.
Mizo Inchai title fight a kawnghren inchuh turte: Pate : B. Lalawmpuia Saitual vs Johny Lallawmkima Saitual, Pa laihawl : Ramropuia (Challenger) vs Remruatpuia (Champion), Palian: Lalsangliana (Champion) vs C Lalremtluanga (Challenger), Nute : Lalvenhimi (C) vs C Lalrinfeli (Challenger), Nu laihawl : Ruthi Lalhruaitluangi (Challenger) vs Elizabeth Rohlhpuii (C), Nulian ; Zodinpuii (Challenger) vs Lalhmangaihsangi (C).
Palian champion Lalsangliana’n a kwnghren humhim ngei tumin tan a khawh a, inbuatsaihna a nei tha viau tawh. Hetihlai hian a khingpui tur Remtluanga pawhin Sangliana hneha, inchai hmuhnawm lantir ngei tumin tan a khawh nasa viau bawk.
MWA buatsaihin, ni 25-27 August, 2026 chhung khian Mamit Multipurpose Hall-ah Inter District Wrestling Championship 2026 neih tur a ni bawk a. He hunah hian Mizoram chhunga wrestler tha ber berte an inlan tura ngaih a ni.
Palian champion Sangliana a inbuatsaih tha
