Kh.Thang Dailo
Fate khabe hnuaia hawi mai mai kan nih tawh hnu, tih sual palh thulha fa ten sawn thlak nulh thei dinhmuna ding zuau zuau tawh nih hnu thleng pawh hian naupan lai ngaih a bang lo va, a zual ting emaw tih mai tur a ni. Kan fate vangin kan hre chhuak fo a, thiante nena titi lah a tinuam hlei hlei a.
Sikul kha:
Sikul kan luh tirh atang rengin, pencil pawh a tlawn tlawna pai phal lohna chhungkuaa seilian ka ni. Hmun hnihah tan bun a, a bo loh nan a hmawr zai rekah la thlun a, ipte hrui nen nghet taka thlun zawm tur a ni. Ziaklohbu Mikado pakhat kan neih chuan tu ta mah kan awt thiang lo. Chu lehkhabu hlu takah chuan subject zawng zawng a leng vek a, Mathematics kan zir chuan chu Mikado chu phawrh vat tur a ni a. English kan zir chuan chu tho chu phawrh tur a ni. Mizo leh science kan zir erawh chuan chu Mikado chu phawrh thung tur a ni!
Keimah bik hi chuan sikul kha nuam ka ti em em a, lehkhazir te ngai lo phei se chuan sikul kal kha ka nuam tih ber a nih ka ring. Sikul nih tak avanga lehkha zir kher a ngai ziah kha a ninawm khawp mai. Ni tin insual te kha thil ropui a ni lo, hmeichhia mah ni ila hotu ten mipa an hremna ang apiang hlawh phak ve zel nih pawh kha insawitheih nan a tlak loh a ni. Miin, “Heiang mi hi chu an inzir puitling ngai lo” an tih ang chi-a ‘hetiang mi’ an tih mizia ang kha ka nei kim vek tlat mai a; ka heti ta vel mai mai reng a.
A tute mai pawh kha kan harhin kan thawveng em em mai a, ka lehkha zirlai hi ka thiam lo palh ang tih hlau chhete lo, dar rik hma leh chawlhlawk laia Zawng ran Bemkawng chiau vak vak, Thlanthla rial den an sawi ang maia chiar nuaih nuaih, bangrel vela ban kual zui zui paha kuk ruih ruih leh home work ti alawi awm lo thin kha kan ni a, kan ropui lo a ni. Kan sikula naupang ho hrim hrim kha chu lungkham nei lo, changkel tam tlurh ringawt, hmelchhe hlawm si, mawl bawk si kan ni.
Home work thiam lo hrem ngai zingah life member fee chawi bik niawm taka ding hmelchhe ni tin ziah ka ni. Hmeichhe zingah kei aia vuak hlawh ngun an awm lo. Mipa hlang an hrem paw’n ka tel tho a, chhan erawh a nei tha thin. Midang an thingthit ringawt lai pawha dawhkan an puttir bik, ban an phar ringawt lai pawha thingthi-a sikul tual heltir ngat bik khawpa an duhsak ka ni thin kha a ni a. Insual case, naupang dang fuihpawrha insualtir case leh case hrang hrang vangin Office kha ka lut zur zut a, hotute leh sikul naupang dangte hriat ka hlawh bik dan a ropui lo em em thin.
A ipte-a Laiking ka lo dah sak avanga min um paha, “Zoremsiam thi rawh…thi rawh” min titu, a mawng ka vai kahpup avang tho va ek in lama kel ruah hlau tlan thlak dawr dawr chunga thi tura min titu tho Thangpuii(A thla muangin chawl se) te, tlan paha a hnute ka tham sak fahran thin Maruati te an ngaihawm a. Class a rawn lak dawn laia kan lo insual si avanga class la lo va min insualtir ngat ngattu hotu rilru zau, Sir Peka te kha khawiah tak awm ve ang maw!
Lui kal pawh:
Lui kal tur hian phalna hmuh a har thin viau a. Naupang dangte tan chuan a har kher lo mai thei; ka tan a harsat thin chhan pawh eng dang a ni chuang lo va, an phal loh pawha aruka ka kal tho thin vang a ni. Lui kal ruk dan hi keimah chauhin ka hmang tangkai lo va, ka thiante thlengin, ka plan fing leh hmantlak tak chu an chhawr tangkai em em vek mai a ni. Buaithlak deuh chu plan A chauh kan nei a, plan A a fail chuan kal theih loh a ni mai; chuvangin plan A hi a fuh ngei ngei a, a hlawhtlin ngei ngei a ngai.
Plan A:
Chaw ei khamah e tur ang deuhin ek in lamah kan kal thla ang a, kan zai ngei ngei tur a ni. A theih hram chuan Pathian hla sak tur. Ek in kawngka luh hmain tukverh-ah dak an awm em kan en ang a, lo dak an awm chuan luh tur. Ek in bang awng atangin kan bih ang a, lo dak mek kha a luh veleh kan chhuak ang a, ek in hnung lamah pheiin huan mawng lam kan pan thla ang a. Kan in lang thei lo turin ek in phenah zel kan kal ang a, ZAI TAWH MIAH LOH TUR! Huan hungna thirhling karah kan chhuak ang a, kawngpui kan thlen veleh chang tumin thiante signal tawh mai tur a ni. Chhungte phalna lova kal awm mah ila, phalna la ngeia kal an awm ve tho bawk a, anni chaw fun leh meizial bung pai chu a ruka kalte chuan kan ring ve mai thin. Plan a fail chang chuan nu ten hmunphiaha vawi nga vel vuak emaw, na ve pangngai taka vawi thum kuk kha kan hlawh a ni mai a, na vak lo mah se plan a fuh kan duh daih zawk!
Inrinni a lo thleng a, Tuila lam panin naupang lui kal tur an rawn thawm thla nak nak thin a. An sikul ipte hlui, a hrui chat tawh suih zawm leh an ak chhing tau a, vai ho manganpui fe fe tur vai hla ang deuh deuh sain an au thla chuah chuah a. A thenin chang an tum raih raih a, a kûka kûk kawng tluan peih pawh an awm. Balh hlau miah lo ramvachal rual tlan thlakna hnu chu a khu tha duh rem rem viau thin.
|henawm naupang Boy-a, sam sen khawng fua mai, buk zet inkeu lawp lawpa a tlan thla te khan mitthla an luah leh fo mai. A kawr hak, en thuaka uk anga lang deuh, en ngun deuha lo eng deuh si hain, kekawr laklawh zet a khup khuh hlap, a ngal lang thei deuh sin nen, a Burma slipper, a hrui lehlamin a peih loh san tak avanga hrui dang an vuah, a chah leh tep tawh avanga thirzaia an tawn tap bun chungin a kekawr kawng chu hruikhau hian a phuar tap a. En mai pawh hian thosi seh satliah leh thakpui kang nazawng chu eng teh ualah mah a ngai dawn lo tih a lang reng mai.
Lui thlen hma fe atangin an han au a, “Yeeaaahh…commando lechi fraih na khraass” tih liah liah paha thawmhnaw phelh nghalin, ramhuai speed dik tak maia tlanin Li an han pan a, “chaaargge” an tih meuh chuan an zuang lut a ni tawh mai! Duhtawkin tui an han cheng a, a vawh deuh hnuah nisa-ah an inhem lum leh a; an cheng leh thin a. Chuti reng reng chuan ni an leng ta thin a. Naupang nghal zual an lo awm a, thiante iniluh laia li chhunga lung lo chhut ching te, mei luma an rawn inhem dawna an thutna tur lung lo rawh sat te an ching a. An inhau fiam nak nak thin.
A thenin a hma ni lama mi sangha vuaknaa sangha rui an chhar bang te an lo dap ve bawk a, chu chu ‘nghadah’ kan ti thin. Lung an rawh sa a, tah chuan an hem hmin ve phang thin. Tui chen hlana thiante thawmhnaw lo thuhruk ching kha kei lo pawh an awm nual a, a runthlak duh viau. Beng chhet rum rumin tlumther rim kan nam haw vut vut a, ngal paw hruihin kan kal thâng huam huam a, kan inbual leh ngai lem hlei lo va!
Kan naupan laia inkawm ho, zir run khat bela ni chhun ka chhiarpuite kha alawm, ka ngaih thin chu. |hen ten nupui pasal neiin tlang hran mual hran an bel ta a, a then puini lawiin famrolungmual an mawi ta bawk a. A la dam zinga an chanchin ka hriat theihte pawhin facebook lamah an fa lu lawk te te an hung sahthlau ve ta duah mai. Rindika te erawh, necktie chhemi nena Insuih titi-ik chuihin Bible an la zakzeh nui vur vur a, tlan chak hmel vawk khawpa sam bin pialin zaipawl tenau deuh an la bass ve chhur chhur rih. Ka hming an hriat chhuah changin, an lung a leng ve ngei ang a, a then chuan min la ngei mai thei bawk.