Daily Newspaper

Pandemic vangin thalaiah anxiety leh depression nasa

28

Khawvel puma thalai zahve vel zet te chuan Covid-19 pandemic avangin an hmalam hun chiang lova ngaiin anxiety emaw depression an nei thei tiin United Nations agency International Labour Organization te chuan an sawi.

ILO tena ‘Youth and COVID-19: Impacts on jobs, education, rights and mental well-being’ survey an neih hnuah thalai te tana hmalakna a awm vat lo a nih chuan pandemic nghawng na tak hun awh rei tak a thlen theih thu an sawi a.

“Covid-19 hian kan nunphung kawng tin reng a tibuai vek a. Pandemic thlen hma pawhin thalaite social leh economic integration pawh chona a ni sa tawh a ni. Tunah nasa taka hmalak vat a nih loh chuan thalai ten pandemic avanga tawrhna daihrei tak an tawk dawn a ni,” tiin report chuan a tarlang.

ILO survey chuan pandemic in thalai (kum 18 atanga 29) inkar tena hna, zirna, rilru lam, rights leh social activism lama a nghawng an zirchiang a ni.
Ram 112 atangin chhanna 12,000 an dawng a, a tam ber te chu Internet hmang lehkha thiam te an ni bawk.

Survey chuan mi pahniha pakhat (50 percent) te chuan anxiety emaw depression an nei a, 17 per cent te chu a khawih na viau bawk a.

“Zirna leh hnathawh health crisis-in a nghawng nat avangin thalai tam tak rilru a nghawng nasa a ni,” tiin Survey chuan a tarlang. Mental well-being chu thalaiah pawh hmeichhia leh la thalai zual kum 18 leh 24 inkarah a nasa zual niin tarlan a ni bawk.

Hnathawk thei lo, an hnathawh tawp ta bawk si chuan anxiety emaw depression an neih theihna a sang ber tiin an sawi bawk a. Hei hian mental well-being, education lama hlawhtlinna leh labour market integration inthlunzawm dan a pholang tiin tarlan a ni bawk.

An zirna chhunzawm theih loh emaw hlawhchham hlau te chuan anxiety an nei nasa zual bik bawk a. |halai zingah Covid-19 avanga an hmalam hun chiang lova ngai 38 per cent an awm bawk.

ILO te chuan Covid-19 chuan nghawng a neih inpholang zelin thalai paruk zinga pakhat zel chuan pandemic avangin hna an thawk thei tawh lo niin a tarlang bawk a. |halai tam ber te chu service emaw sales kaih hnawih lama thawk an nih avangin pandemic avanga an tawrhna a nasa zual niin tarlan a ni bawk a.

Thalai 73 per cent lai pandemic len hmaa zirna kalpui te chuan online leh distance learning lam an ti ve thei lo tiin tarlan a ni bawk a.

Coronavirus chuan mi pariata pakhat zel chu ram changkang lovah online hmanga zirna chhunzawm ve thei lovin a siam mek a, hei hian hmun hran hranah intluktlanlohna a siam nasa niin tarlan a ni bawk.

Sorkar leh school-in theih tawp chhuaha zirna a theih anga kalpui a tum chung pawhin thalai 65 per cent te chuan pandemic len hnuah an zir tlem hle tih hmuhchuah a ni bawk a.

Pandemic chuan thalai hnathawk la naupang zawkte pawh khawih na hlein a bik takin clerical support, services, sales, crafts leh hetiang lam kaihhnawih sum dawnnaa inhnamhnawih te a khawih na bik a ni.

ILO Director-General Guy Ryder chuan, “Pandemic hian thalaite a nghawng na hle a. An hna a chhuhsak mai a ni lo va, an zirna leh training tin te bakah an rilru lam thlengin a khawih a ni,” tiin a sawi.

Heti chung hian thalai te chuan pandemic laiin volunteer hna thawkin chet an la tho va, an thu leh hla ngaihthlak chu thil pawimawh a nih thu ILO chuan a sawi bawk.

(THE AIZAWL POST – Rampawn)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy