Daily Newspaper

Paris khawpuiah khuahkhirhna khauh zawkin kalpui

18

Vawiin atangin Paris a bar tinte chu khar vek tur niin French sorkar chuan coronavirus alert chu a sang berah dahin hei hi tun hnaia inkai chhawn turu vang a ni.

Nimin khan khuahkhirhna dan thar puan niin hei hian karhnih chhung a awh tur thu Prime Minister Jean Castex chuan a sawi.

Pathianni khan France chuan Covid-19 kaithar 12,565 a nei a. Karkalta khan Marseille khawpuiah pawh bar leh restaurant te chu khar a lo ni tawh bawk.

France-ah hian mi 100,000 zelah 250 in virus an kai a nih chuan leh intensive care khum 30% luah a nih chuan alert level a sang berah puan theih a ni.

Paris khawpuiah restaurant hawng tur te chuan sanitary arrangement thar an kalpui a ngai dawn a, university lecture hall ah pawh a leng chi zahve bak phal a ni lo bawk.

Interior Minister Gerald Darmanin chuan bar khar chu Parisian te tan a harsat tur thu a sawi a. “French kan ni a, zu in kan duh a, ei a, nun leh nuiha infawh tawn duh kan ni” tiin French TV channel LCI leh Europe 1 hnenah a sawi.

26 September khan French khawpui lian pahnihna Marseille chuan an bar, restaurant leh gym te chu karhnih chhung atan a lo khar tawh bawk a. Hei bakah hian public venue tin theatre, museum leh cinema te pawh a khar vek bawk.

France hian kumin August thla atanga Covid-19 inkaichhawn nasat chu a thunun thei meuh tawh lo va, nitin kai thar an pung zel zawk a ni. Sorkar chuan ram pum huapa lockdown bur a duh tawh si loh avangin khawpui liana virus len nasatnaah khuahkhirhna khauh tak a kalpui ta zawk a ni.

Europe hmun dangah Czech Republic ah chuan sorkarin Covid-19 leng darh a thunun thei lo mek a. Nimin atang khan kar hnih chhung awh khuahkhirhna khauh tak kalpui niin secondary school te pawh khar a ni a, restaurant leh bar-ah pawh khuahkhirhna khauh zawk kalpui a ni bawk a. Tun hnai kar hnih chhungin Europe ram zingah Spain tihlohah Czech chu virus inkaichhawn nasatna ber niin nunna chan tam lamah palina an ni bawk.

Spain khawpui Madrid pawh lockdown a ni mek a, Madrid-ah hian mi nuai khatah 700 zelin Covid-19 kai ang an ni mek a ni.

Italian health minister pawhin tunkar chhungin sorkar chuan virus inkaichhawn thunun a nih theih nan ruahmanna thar a tihchhuah tur thu a sawi bawk a, Italy chhim lamah virus inkaichhawn a nasat zual vang a ni.

Europe khawmualpui ram hrang hrangah coronavirus leng thawh hnihna a thleng leh meka ngaih a ni a, kai thar leh nunna chan an pung hle.

(THE AIZAWL POST – Rampawn)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy