Daily Newspaper

Paris khawpuiah tharum thawhna thleng nasa

9

Paris khawpuiah France sorkar in sawisel hlawh ‘security law’ thar kalpui a tum vanga lungawilohna a lantir avangin police te nena inbakkaihna a thleng nasa hle.

Lu khuha lungawilohna lantirtu tena dawr kawngkhar leh darthlalang te an tihchhiat avangin police ten tear gas nen an beilet a.

Sorkarin security law thar kalpui a tum duh loh avang hian rally 100 chuang France hmun hrang hrangah kalpui tum a ni a. He dan thar hian police te tihchhiat tumnaa an thlalak laksak thlengin a khap a ni.

Sawiseltute chuan he dan thar kalpui tum hian press freedom rapbetin police te nunrawn phalna a pe an ti bawk a. Mingo police tena black music producer an vuak lai thehdarh a nih hnuah France hmun tinah he draft bill duh lohna hi lantir nasat zual a ni.

President Emmanuel Macron party te chuan draft law thenkhat lai chu siamthat tur a nih thu an sawi chungin lungawilote an lawm chuang lo va.

Macron chuan police tharum thawh hrat an awm chu a pawm thu sawiin hrem tur an nih thu a sawi bawk.

Kar kalta Inrinni khan anti-government Yellow Vest movement kalpuia mi sang tam takin kawngzawhna buaina awm lova an neih laiin mi thenkhat a duma inthuama an hmai khuh te chuan police te chu an bei thut nin Reuters chuan sawi a.

Super market tukverhte tichhia in bank te suasam a ni bawk a, police ten tear gas hmangin an beilet niin AFP news chuan a tarlang bawk. Police te chuan rioter 500 chuangin kawngzawhna neite hi belhin buaina an chawk chhuak tiin an sawi a, mi 22 man an nih thu an sawi bawk.

Paris bakah Marseille, Lyon leh Rennes ah te lungawilohna buaina awm lova neih a ni thung a.

Sorkarin dan thar a kalpui tumah police duty lai te ‘taksa emaw rilru lama tihchhiat tum’ rilru pua an thlalak thehdarh chu dan kalh a ni dawn a. Chung ti te chu lung ina kum khat tan bakah dollar 54,000 chawi tir theih an ni.

He dan duh lo te chuan police te chu humhim bur ni dawnin social media-a an chungchang tarlan te a khap dawn an ti a ni. Media freedom leh police te thlaklak khap chu kalpui chi ni lovah an ngai a ni.

France hi tun hnaiah racidalism in a nuai hneh hlea ngaih niin hei vang hian Emmanuel Macron chuan France chu radical tena an thunun a remtih loh tur thu sawiin a bik takin Islamic radical tena tualzawl bera an neih a remtih loh tur thu a sawi a. France President chetdan avang hian Muslim ram hrang hrangah France bungrua boycott-na te a thleng nual a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy