Kumin Paris Olympic Games-ah hian a vawikhatna atan World Athletics chuan an infiammi gold medal late tan prize money a semchhuak dawn a, hei hi cycling governing body UCI president David Lappartient chuan sawiselin, Olympic spirit a kalh niin a sawi.
Athletics events bik hi kumin August ni 1-11 chhunga zawh fel tura ruahman a ni a, World Athletics chu federation hrang hrang zinga summer Olympic Games bika prize money pechhuak hmasaber tur niin, athletics events bika gold medallist hnenah US dollar 50,000 (£39,400) zel an tiam.
UCI president David Lappartient chuan hei hi na taka sawiselin, “Olympic spirit tihbona a ni dawn a, top athlete-te hnena sum kan siam chuan khawvel pumpuia athlete-te tan remchanna leh hun remchang a nuaibo dawn a ni,” a ti.
Olympics bulthutah chuan he inelna hi amateur sports event a ni a, International Olympic Committee (IOC) hian infiammite hnenah award prize a pechhuak ngai lo a, chumi aiah international federations (IF) leh national Olympic committees (NOC)-te hnenah fund a pe chauh zawk thin a ni.
World Athletics hian kumin Paris Games-ah athletics atanga gold medal late tan sumfai a pe phawt ang a, 2028 Games atangin silver leh bronze medallist-te tan prize money semchhuah leh tumin ruahmanna a siam nghal bawk a; an pawl president Lord Coe-a’n he thu a puan hnuah athlete chawl tawhte’n lawmawm tiin an fak a, mahse, sawiseltu an awm chho mek bawk.
Thawhlehni khan Lappartient chuan prize money siam hi Olympic spirit nena inkalh tlat nia a ngaih thu sawichhuakin, anni lam chuan prize money pek tumna hi ngaihtuah pawh an la ngaihtuah chhin loh thu a sawi.
Coe pawh zawhna an zawt a, prize money chu Olympic spirit kalh a ni thei em tih zawhna chhangin, athlete-te tana awlsamna leh athletics khawvela an cham rei theihna tur zawk a nih a beisei thu leh inbuatsaih lehzelna atana puitu tangkai a nih thu a sawi a, Olympic principles nena inhnerem thlap tura a ngaih thu a sawi ve thung.
Paris Olympics 2024 prize money sawiseltu cycling boss David
