Parking area siamthatna leh
reserved price tihpun pawm
Aizawl Municipal Corporation chuan parking area siamthatna tur leh parking area auction-a reserved price tih punna tur a pawm.
Aizawl mayor Lalrinenga Sailo kaihhruaiin Zirtawpni khan AMC Board of Corporators an thukhawm a. Executive corporator (Cash & Accounts) Lalringliana’n AMC Annual Financial Statement 2024- 2025 a pharh a. Aizawl khawpuiin inkaihhruaina tha zawk a neih theihna tura dan thar siam rawtna leh a awmsa siamthat rawtna sawiho hnuah lungrual taka pawm a ni.
AMC dan siamthat zingah AMC Building Regulations 2012 siamthatna – Green Building chungchang telh belhna leh technical mi licence dam chhung tihrei, AMC Licensing Regulations 2012 hnuaia shop licence dam chhung tirei tura siamthatna pawm a ni. AMC Display of Advertising and Hoarding Regulations 2013 hnuaia hoarding leh advertisement rate siamthat rawtna, AMC (Control of Parking and Collection of Parking Fee) Regulations 2012 hmanga parking area siamthatna leh reserved price tih pun pawh pawm a ni.
AMC-in a la neih ngai loh ran vulh khuahkhirhna – Draft Aizawl Municipal Corporation Pet (Cat & Dog) Regulations leh Draft Aizawl Municipal Corporation Pig & Poultry Rearing Regulations, ran talh dan leh a hmun inkaihhruaina dan – Draft AMC Animal Slaughter House Regulations pawm thar a ni bawk.
BOC thutkhawmah hian AMC dan hman hrang hrang hmangin local council-ten a hmun loa bawlhhlawh paih, leivung paih, ek in leh septic tank thianghlim lo leh felfai lo, vengchhunga lirthei zan riah khuahkhirh chungchangah hma an lo lak dan tur ruahmanna a pawm a ni.
Parking area siamthatna leh reserved price tihpun pawm
