Kan hmaah enge lo thleng dawn kan hriat loh avangin hnam leh sakhaw himna atan Parliament-a tawnhriat nei member kan mamawh hun lai tak a ni a, Rajya Sabha MP ni mek K Vanlalvena chu Lok Sabha MP atana tha ber a ni tih MNF senior vice president Dr R Lalthangliana chuan a sawi.
MP inthlan campaign-a a fehchhuahnaah MNF senior vice president chuan MP tam tak, zaa 90 vel hian term khat chhungin Parliament-ah thu an sawi mang loa, Mizo mipui MP candidate Pu K Vanlalvena hi chu mi seh hel tak niin, kum thum awrh a MP chhungin vawi 15 thu a sawi hman a. Party ang zawnga en loin, Mizo mipui tan a tha thlawt tih a sawi.
“Pu K Vanlalvena hi MNF party thehchhuah ni mah se, Mizo mipui MP candidate a ni. Kan hnam leh sakhaw him nan MP (LS) ah kan thlan tlin ngei a ngai. Mizoramin MP kan neih tawhah Parliament-a thu sawi miah lo an awm nual a, Pu Vena hi chuan speaker-in a phal lo chung pawhin Mizo mipui tan a sawi lui a, a microphone pawh off sak hial a ni. Kan hmaah enge lo thleng dawn kan hre lo, Mizoram tan Parliament-ah experience nei tha leh huai taka auchhuak ngam kan mamawh a ni,” a ti.
Parliament-a tawnhriat nei kan mamawh hun lai a ni – Dr R Lalthangliana
