Daily Newspaper

Parma mualah Juve chak nuamsa

11

Cristiano Ronaldo chuan goal hnih khungin Inrinni zan khan Parma mualah Italian champion chu 4-0 hnehna lian a chanpui a, match khata khel tlemin an chung chiaha awm pahnihna Inter Milan nen point inang an nei a, hmahruaitu AC Milan lakah point khatin an hnufual thung a, Milan khaw team pahnih hian nizan result tarlan hman loha an tumpui ve ve an hneh chuan Juventus hi an kalsan hle leh hret ang.

Chak reng harsat mah se Juve-in Serie A season kal laiah tlawm an la nei lo a, chutiang record nen chuan Stadio Ennio Tardini-ah mualneitu Parma an luhkhung a; first half minute 23 an khelh tlin rualin Sweden forward kum 20 mi lek Dejan Kulusevski chuan Alex Sandro pass atangin Andrea Pirlo team hmahruaina goal a khung a, a hnu lawkah Ronaldo chuan Alvaro Morata thawhrah atangin an goal hnihna a khung ve leh a, half time-ah mikhual team-in sihnih faiin hma an hruai phawt.

Second half tan atanga minute thum an khelh tlin hmain Cristiano Ronaldo bawkin goal hmahruai leh he match-a a goal hnihna chu Ramsey ball chhawpsak atangin a thun a, ti hian, season kal laia Serie A game kua a khelh tawh atangin goal 12 a puitlin a, assist vawikhat a nei tawh bawk.

Hun tawp hnaih tawh lamah Alvaro Morata chuan Federico Bernardeschi cross atangin chiang zawka Juve chakna goal a khung a, pathumna Juventus-in game 13-a draw vawiruk ngawt an neih tawh avangin pathumna chungah an la chuang zo lo a, an hmaa awm Milan khaw team pahnih erawh na takin an nawr chhunzawm zel.

Italian title hnuhnung pakua hawn fai vektu Turin club hi tun season kal lai Europe league lian zual panga khel zinga tlawm la nei lo awmchhun an ni.

Karliamta Nilainia Atalanta an draw tuma penalty thun zo lo Ronaldo khan Real Madrid chhuahsana Serie A goal 73 a khelh tawh atangin goal 63 a thun tling tawh a, kum 35 mi Portuguese hi Bayern Munich goal thun khawl Robert Lewandowski nen kumin chhung bika Europe top five league khel zinga goal khung hnember niin, Inrinni khan Lewandowski hian goal 32 a puitlin ve chiah.

Inrinni inkhel dangah sikhat ve ve thunin Fiorentina leh Hellas Verona an inhnehtawk a, Sampdoria chuan 3-1-in Crotone an hneh.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy