Sawrkar lai party chhungah innghirnghona a nasat viau chuan ministry-in a tuar a, hmasawnna hnathawh thlengin a tuar thin tih ZPM hruaitu, chief minister Lalduhoma chuan a sawi.
ZPM Gen. Hqrs. Organisation Department chuan Ningani khan intuaitharna hun an hmang a. ZPM hruaitu atangin chief minister Lalduhoma, minister Lalnghinglova Hmar leh ZPM vice president C Lalnunnema ten hmanpuiin, secretary general Er Vanlalneiha Ralte chu resource person a ni.
Political party-ten kalphung hrang hrang an nei a, party insawhngheh chu thil pawimawh tak a ni a, chumi tur chuan constituency hrang hrang viltu tur an inruat thin tih Lalduhoma hian a sawi. ZPM pawh party naupang tak an la ni a, party inrelbawlna kawngah zir tur an la ngah hle a, insawhngheh chhoh zel an ngaih avangin intuaithar reng an ngai tih a sawi a ni.
“Pawlah chuan thawhhona tha neih a pawimawh a, thawhhona tha chuan pawl a tichak thin. Party chu a malin a kal thei loa, ministry leh mipui nen inpawh tlang takin a kal tur a ni. Sawrkar tha tichak a, hmalakna tihlawhtling turin party a insawhngeh a ngai a. Party-ah inlungrualna a awm loh a, innghirnghona a nasat viau chuan ministry-in a tuar a, hmasawnna hnathawh thlengin a tuar a, ramin a tuar thin,” a ti.
Minister Lalnghinglova Hmar chuan mipui leh party worker thawkrim tak takte zarah roreltu dinhmunah an ding ta a. An tun dinhmunah an duhtawk mai tur a ni loa, insawhngheh deuh deuh an ngai a, chumi tur chuan inpekna, tha thona, thawhrimna an mamawh tih a sawi. Chutih rualin tih tur leh tih loh tur thliarfel a ngai a, an tumah an chiang tur a ni tih a sawi bawk.
“Kan ram rorelnaah thil thar thlentir kan tum a, Pathian ram a thlen theih nan kan au thin. Chumi chu a thlen theihna turin kan campaign dan leh kan hnathawhah mipui mit a tlung tur a ni a, a pawimawh berah chuan Pathian malsawm tlakin kan thawk tur a ni,” a ti.
Party-ah innghirnghona a nasat viau chuan ministry-in a tuar – Lalduhoma
