ZPM president chuan, sawrkar chu party-in a siam a ni a, party-in kalphung leh tum a nei a, chu kan duhna tipuitling tur chuan sawrkar a lo piang ta a ni, tiin a sawi a. ‘Party leh sawrkar hi a kal hrang thei lo a, party mipui duh dan tihhlawhtlin a pawimawh rualin, ram mipui thatna tur tihpuitlin hi a pawimawh ber zawk chu a ni’ a ti bawk.
Tun tum sawrkar lo pian theihna chhan hi neutral vote vang a nih thu ZPM hruaituten an sawi thin a, sawrkar chu party mal bil sawrkar ni lovin, mipui sawrkar a nih thu pawh uar takin an sawi thin; anmahni vote lotute pawh inthlahrung lo tur leh, thlei bik nei lo, party party sawi lova inangkhata rorel a nih tur thu pawh sawi a ni thin.
Party chuan ram leh hnam kaihhruaina tura tihhlawhtlin tur a duan policy kha mipui hnenah a zuar a, mipuiin tha an ti a, mipuiin sawrkarna an siamtir a. Sawrkar a lo pian takah chuan ‘sawrkar policy’ a lo ni ta thin a ni. ‘Party mipui’ tih leh ‘ram mipui’ tia sawi hran nuaih hian inthleina lam a kawk deuh em aw a tih theih a; mipui tan hriat a nuam lo thei a ni.
Tuna ‘sawrkar hi party-in a siam a ni a…’ tih tawngkam hriattur lo awm ta pawh hian, neutral vote avanga sawrkar lo piang thei a nihzia sawi thin kha a rawn thai chhe deuh em aw a tih theih awm e. Party mi leh sate chuan duhsakna lo chang deuh bik pawh ni se, an thiamawm e..’ tih lam a awn deuhin a hriat a. A nihna takah chuan, party mi leh sate chu induhsak deuh pawh ni se, mipuiin tih theih an nei tak tak lo. Hei hi chu, eng sawrkar hnuaiah pawh, party mi leh sate induhsak bikna hi chu sawi ngai lova chiang sa, thil thleng thin a ni.
Chutih rualin, ‘party mipui duh dan’ tihhlawhtlin a pawimawh rualin, ram mipui thatna tur tihpuitlin hi a pawimawh ber zawk chu a ni’ tih hian eng ber nge a kawh hriatthiam a har deuh a. Election campaign laia ‘huapzo sawrkar’ ‘langtlang sawrkar’ tih thin leh, tuna sawrkar a lo pian tak hnua ‘party mipui duh dan’ tia sawi rik a ni ta hi ngaih kawih a awl dawn riau niin a lang.
‘Party mipui’ leh ‘Ram mipui’
