ZPM chu poitical party pahnihin an do rawn a, an kalsual tur an venpui reng avangin lawmawm an ti hle tih ZPM leader Lalduhoma chuan a sawi.
Inrinnia Sairanga ZPM Aizawl West I Block II programme buatsaih a hmanpuinaah Lalduhoma chuan tunlai hian party pahnihin an do rawn mek a, hei hian dinhmun tha takah an ding tih a tilang chiang hle tih a sawi. “Party dang hian min bei nasa viau a, kan kalsual an hlau hle a, min veng char char tihna a ni. Kan kalsual hlek nia an hriat chuan nasa takin min sawisel thin a, a lawmawm kan ti hle. Sawrkar tharah pawh opposition tha tak an nih kan ring a. An thil tih tawh ang hi kan ti ve a nih chuan rang takin an rawn sawisel nghal dawn a, chu chuan hmalakna zelah nasa takin min puih kan beisei,” a ti.
ZPM chu tualto party a ni a, tuma bawiah an lut dawn lo tih sawiin, “Vai pawl kan zawm ve dawn lo. Kan ram kan hnam kan sakhua tan kan ding zel dawn. Kan hnam hi a insingsa mek a, ZPM hian kan political goal chu Zofate zawng zawng rorelna pakhat hnuaia awm a la ni reng a, hei hi engtikah mah kan thlauh thla dawn lo,” a ti.
Eiru lo tura intiam ngam candidate an nei tur ringawt pawh chu a thlamuanthlak hle tih ZPM leader hian a sawi. “Vote kan thlakin tunge chief minister tur tih hrereng chungin vote kan thlak tur a ni a, kan bial chauh thlir loin ram pum thlir zel turin kan inchah a ni,” a ti.
Party pahnihin min do rawn – ZPM leader
