Party-te inbeihna phenah
hian thudik a zawn theih
– MPCC thupuangtu
Politics-ah mipuiin thudik zawn a tul a, party-te inbeihna phenah thudik a zawn theih tih Congress hruaitu Dr Lallianchhunga chuan a sawi.
Zirtawpnia Congress Bhavan-a inkhawmah MPCC thupuangtu Dr Lallianchhunga hian politics-ah mipuiin thudik zawn a tul tih sawiin, “Party inbeihna phenah hian thudik a zawn theih. Ruling party zar zotute chuan thudik an zawng loa, contract petu an pute chu engtiang pawhin lo tan mah se, mipui zawk hian politics-ah thudik zawng hram hram ang u. Awihawm taka thusawi thiam ringawt hi kan ramin a thatpui lo. Ram hruaitu tur chu thusawi thiam lo deuh pawh nise, dawt sawi mai hreh lo ai chuan thlan ngam a hun tawh,” a ti.
Chief minister thutthleng chu a zahawmin, thu belhchian dawl lo sawi mai maina hmun tur a ni lo tih a sawi. Tuna chief minister chu a minister pakhatin Assembly House-ah a rawn phawrh fai kelh a, UNNATI Scheme hnuaiah CM-te chhungkua in tanpuina subsidy an lo dawng reng reng lo tih a rawn sawi thu a sawichhawng. CM-in amah interview-tu journalist chu CM thutthleng atangin a lo dawngsawng tih sawiin, ZPM sawrkar hnuaiah CM thutthleng an tibawrhbang zo ta tihna a ni tih a sawi a ni.
ZPM sawrkar hnuaah sawhthing chingtute an mangang hle tih sawiin Dr. Lallianchhunga hian sawiin, “ZPM sawrkarin Buyers’ Market an siam a. Sawhthing chingtute hi a baa sawrkar hnena hralh aiin a man pe nghal thei hnenah hralh lo thei lo dinhmunah an din tir a ni. Buyers’ Market hi thiah loh chuan sawhthing chingtute dinhmun hi a chhe zel ang,” a ti.
Hindutva thlipuiin min nuai tan a. Tun hmaa insawithaihna ang leka an inpuh thin kha tunah chuan a tak takin a rawn thleng tawh niin Congress thupuangtu hian a sawi. Chief minister, kohhran upa Pu Lalduhoma pawh Hindu pathian Durga fakna leh chibai buknaah loh theih loha din tir a ni tih a sawi bawk.
“Vande Mataram chang 5-naah Hindu pathian Durga fakna leh chibai bukna a awm a. Hei hi kan dodal ngam loh chuan thangtharte rilruah Kristianna lungphum sawithiahin a la awm ngei dawn. Kohhran pawhin ngun taka min ngaihven sak turin ka sawm a. Congress party kan thlawp loh chuan Mizoram-a party zingah Hindutva thlipui kengtu central BJP dodal ngam an awm lo,” a ti.
Party-te inbeihna phenah hian thudik a zawn theih – MPCC thupuangtu
