Daily Newspaper

Pathianin hun harsa atan MNF a ruat – MNF vice president

18

Hun harsa a lo thlen dawnin mipuite hruai turin Pathian-in Mizo National Front a ruat thin tih an party vice president Lalthlengliana chuan a sawi.

Nilainia MNF office – Mizo Hnam Run kharna inkhawmah MNF vice president hian thu a sawi a. Hun harsa kara Pathianin MNF a hruai chhuah dan leh tun hrileng karah pawh MNF sawrkar chu chunglam ruat a nih dante a sawi. “MNF a sawrkar tawh chuan harsatna kan tawk thin, tiin mi thenkhatin an sawi thin a. Hei hi an hriat dik tawk loh vang a ni. Hun harsa awm turah Pathianin MNF sawrkar chu mipuite hruai turin a ruat thin a ni zawk,” a ti.

Tuna Covid-19 leng mek chu Congress sawrkar lai chu ni se, zu avang leh hrileng vangin kan buai nasat hle a ring tih Lalthlengliana hian a sawi a. MNF sawrkar hnuaiah tampui tlak laiin a thlawnin buhfai sem a nih thu te, tuna hrileng karah pawh hmasawnna hnathawh a chawlh chuan loh thu te, ram tana a hmaa la awm ngai lo thil thar tam tak a awm thu te a sawi. Lockdown runpui lai kha Mizoram-in buhfai a ngah lai ber a nih thu leh kudam zawng zawng a khah vek thu te a sawi bawk.

Chief minister leh minister-te inpekna avangin Mizoramah Covid kai kan tlem ber bakah thi pawh kan tlem ber tih a sawi a. “Hei hi mipuiin an hriat avangin village council leh local coucil inthlanah 58% leh 83% kan la. Heng zawng zawng hi kan hotuten hna an thawh that vang a ni,” a ti.

MLA atanga Pu Lalduhoma banna chungchang pawh MNF vice president hian a sawi a. “Kum 1985-ah Anti-Defection Law ngaihtuah a ni a, a ngaihtuahtute zingah Pu Duhoma pawh a tel a, dan siamtu tel ban hmasak ber a ni. Pu Lalduhoma hian ama pawl din panga a thiat a, ama din loah a awm kim vek tawh bawk. A lo awm tawhna party-ah a tana hnawk tumah an awm lo. Ama tan amah a hnawk ber,” tiin a sawi.

A chuanna motor a accident dawn chuan a zuang chhuak mai thin nia Pu Lalduhoma’n a sawi tih pawh MNF hruaitu hian a sawi a. “Mahse, a chuanna motor a sawrkar zel. Amah a super em em a, a thut tawhna pawl 12 erawh thaa ram a awm lo,” a ti. Pu Lalduhoma chu disqualify a nih hmain court-a kal tuma insawi siin, a dan bawhchhiat ngei avangin mipui court-ah kal tum leh ta zawk si niin a sawi bawk.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy