Pathianni zana English Premier League khelhah Manchester United chuan an mikhual Nottingham Forrest an hneh a, pathumna ni chungin season an khar dawn. United an chak laiin West Ham United an chak zo lova, tlakhniam an hnaih leh zual.
Champions League khel tura tling chiang tawh Manchester United hian him chiang tawh, chak leh tlawma an dinhmun danglam lutuk tawh lo tur Nottingham Forrest chu Old Trafford-ah an mikhual. Red Devils hian an mualah bul an tan tha viau a, defender Luke Shaw chuan inkhel tan atanga minute 5-na lekah mawi takin a pet goal a, hmahruaina goal a thun nghal.
Hma takah goal thunin an khingpuite nawr zui viau mah se United hian chawlhlawk hmain goal an thun belh thei tawh lova, 1-0 a hmahruai chungin chawlhlawk an hmang.
Chawlhlawk hnu lamah inkhel a hmuhnawm leh zual a, goal li ngat a luh belh. Chawlhlawk hnu lamah mikhual team Forrest in bul an tan tha ve thung a, minute 53-na lekah Morato chuan goal thunin an si phurh a sut.
An si phurh an sut vangin phur viau mah se Forrest an phur rei lo hle. Goal an chhuah hnu lawkah United in an khingpuite an nawr tlang leh nghal a. Bryan Mbeumo chuan a hun tha hlah bawk mah se ball per let leh chu Matheus Cunha chuan awlsam takin a pet goal a, minute 55-na lekah hhma an hruai letna goal a thun zui leh nghal.
Hma an hruai let leh hnuin United an hlauhawm chhunzawm zel a. Uiawm taka a hun tha neih hlahtu Bryan Mbeumo chuan minute 76-naah Bruno Fernandes siamsak atangin an goal thumna a thun ta nge nge a, an hmahruaina a tizau. Mbeumo goal thun tur siamsaktu Bruno Fernandes chuan EPL season khata assist ngah ber Kevin de Bruyne leh Thiery Henry record siam chu a tluk ta a. Record thar siam turin hun tha ala nei bawk. EPL season kal mekah United captain hna tlin taka thawk a, chetha thei tak Fernandes hian EPL ah assist vawi 21 neia record thar a siam thei a nih chuan mimal chawimawina sang a dawn vanga sawiselna a hlawh thin zawng zawng pawh a bo phah ngei a rinawm.
Mbeumo goal thun hnu lawk minute 78-naah Nottingham Forrest tan Morgan Gibbs-White chuan goal thunin an si phurh sut then mah se goal dang a luh belh thei tawh lova, United chuan an mualah 3-2 in hnehna an chang zui ta a ni.
United hian 2025-26 season-a an home match hnuhnung ber an khel a. Season tawp rual chhuak tur midfielder Casemiro thlahna hun an hmang nghal. An midfielder pawimawh Casemiro hi United tantuten mawi takin an thlah a, season khat tal cham belh leh turin an sawm hial nghe nghe a ni.
West Ham in tlakhniam an hnaih
Manchester United in pathumna an luah ngheh laiin him beisei zui tura chak mamawh West Ham United chu Newcastle United lakah 3-1 ngawtin an tlawm a. Nilai zanah Tottenham in Chelsea an hneh a nih chuan West Ham hi an tlahniam chiang tawh dawn a, an tan Tottenham umphak theih a ni tawh dawn lo. Chelsea in Tottenham an hneh hlauh a nih erawh chuan Hammers hian derthawng tak chungin beiseina chhete an la nei zui thei dawn thung.
Pathumna Manchester United
