Daily Newspaper

Pathumnaah PSG tang nghet

12

Pathianni zan Ligue 1 inkhel pakhatah Paris Saint-Germain chuan Lille mualah goal khung zo loin goal awm lo draw an sualchhuak zo hram a, table-ah chho zawnga chesawn zo loin pathumna an luah chhunzawm.

PSG boss Thomas Tuchel chuan he inkhelah hian kheimit hliamin a tihbuai Neymar a chhawr thei lo a, Brazilian international hi kumthar herchhuah hma chuan khelmualah a kir hman tawh dawn loh tih nemngheh a ni.

Tlarhma lama an rohlu dang Kylian Mbappe chuan sam pawl la pu reng chungin bench-ah a thu zet a, a pawlte chak zo lo takngial dawna an lan hnuah Julian Draxler nen second half-ah khelmual an lut a, team an chakpui zo ta bik chuan glo a, he result avang hian Lille chuan table-ah hma an hruai a, goal difference-ah pahnihna Lyon aiin an sang a, a ler an luah.

Paris St-Germain tan tun hi season kal lai league-a point an hloh then vawirukna ni tawhin, Neymar chhawr thei lo mah se inkhel an thunun a, mahse, goal lamah an bil tlat a, hun pumin mualneitu team goal zawnah vawikhat chiah ball an thawnlut zo a, chu pawh goal-ah an chantir zo lo.

Pathumna atanga la talchhuak zo lo PSG hian tun season league kal laiah draw vawihnih nei tawhin, vawili ngawt an tlawm tling tawh bawk a, tunah hian khelh 16-ah point 32 neiin, an hmaa awm pahnih – hmahruaitu Lille leh pahnihna Lyon aiin point khatin an la hniam.

A kum 22-na piancham lawm chunga boot bun Mbappe chuan second half minute 77-ah khelmual a lut a, result tidanglam turin goal a khung zo ta bik lo a, May 2018 hnu lama a vawikhatna atan Parisians chuan league-ah 0-0 draw an hlawhchhuak.

PSG hian naktuk zanah Strasbourg an mikhual leh dawn a, Lille pawhin Montpellier luhkhung ve bawkin, chumi zawhah chawlhkar hnih awh tur thlasik chawlh tawi an hmang zui rih tawh ang.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy