Pawar-a zahna lantir nan Cong-in
a nupui hnenah a bial kian
Maharashtra Deputy Chief Minister Sunetra Pawar- chu kum tira thlawhtheihna chesuala thi, a pasal leh NCP hruaitu hlui, Ajit Pawar-a ‘zahna lantir nan’ Congress-in an candidate a hnuk kir hnuah Baramati byelection-ah chuhpuitu awm lovin hnehna a chang dawn ta.
NCP (SP) hruaitu hlun, Sharad Pawar-a leh Supriya Sule-i ten April 23-a Baramati-a inthlan tura inhnukdawk tura an ngen hnuah Congress hian chuhpui tum lovin an inhnukdawk a ni.
Ajit Dada tia koh thin, Pawar-a hi January thla khan Baramati tlawh tura a kal chu a chuanna helicopter tlaah a thi a. Hetih lai hian Maharashtra deputy chief minister a ni a, Baramati MLA a ni bawk a. Darkar 72 chhungin a nupui, Sunetra-i hi a aiawhin deputy chief minister-ah dah nghal a ni.
Baramati bial hi Pawar chhungkaw kulhpui anga ngaih a ni a. Kum 1991 atang Ajit Pawar-a hian a vawng tawh a, a hmain a pa u, Sharad Pawar-a a lo tling tawh bawk a. Hetianga Pawar-a nupuiin a vawn leh dawn bakah hian Baramati assembly leh parliamentary bial chu Pawar chhungkuain an luah ve ve dawn tihna a ni a, Sule hi Baramati MP a ni ve mek thung a ni.
Ningania inthlan chuh tum tana inhnuhdawh hun hnuhnung berah Maharashtra Congress hotu, Harshvardhan Sapkal-a chuan an party candidate, Amar More-a chu a inhnukdawk dawn tih a puang a ni.
Sapkal-a chuan Election Commission of India (ECI) chu BJP ‘B-team’ anga an chet avangin Congress hian ‘ideological battle’ tia sawiin Sunetra-i khing turan dah tih a sawi a; mahse, tun hmaa Maharashtra-a Congress kaihhruai sorkara tel tawh, Pawar-a zahna vangin an party chuan an dinhmun an thlak ta niin a sawi.
Congress-in an inhnuhdawh tur thu an puan hi Sule-i’n a hma lawka X-a lungkuai taka thu a tar lan hnu lawkah a ni a, “Ajit Dada-a politic zinkawng hi Congress atanga tan a ni a, a hun chhung zawng khan Congress nen hun rei tak chhung zah takin inzawmna a nei reng a… He lungngaihna leh hriatrengna hun lai hian Baramati-a dodalna awm lo inthlanna neih chu a hnuhma zahawm tak leh thinlung taka chawimawina atan a tangkai dawn a ni,” tiin Baramati MP hian a tar lang a ni.
Kar tir lamah khan NCP palai, Chhagan Bhujbal-a leh Dhananjay Munde-a te kaihhruai pawhin Congress hi an candidate hnuk kir turin an lo dawr tawh a. A hranin Sunetra-i hian Congress President Mallikarjun Kharge a sawipui bawk.
Heng thil thleng leh a baka indawrna kal zel a awm hnuah Congress hruaitute chuan Baramati-a inthlan chu chuh ve lo turin an inhnukdawk ta a ni.
Pawar-a zahna lantir nan Cong-in a nupui hnenah a bial kian
