Mizoram Police-in pawikhawihna thleng an zirchiannaah pawikhawihtu tam ber chu kum 18 – 30 inkar an ni a, college rap lo leh sum lakluh tlem, unskilled labour an tam ber tih hmuh a ni.
2023 September atanga 2024 December inkara thubuai ziahluha pawikhawihtu an man mi 3210 dihmun chu Mizoram Police hian zirchiangin an chhinchhiah zel a. An thil hmuhchhuah chu, heng mi 3210 zinga 1566 (48.8%) chu kum 18-30 inkar niin, 1047 (32.6%) chu kum 31-40 inkar, 393 (12.2%) chu kum 41-50 inkar, 155 (4.8%) chu kum 51-60 inkar niin, kum 60 chunglam 49 (1.5%) an awm.
Mi 3210 atang hian ‘thalai’ tia chhal theih, kum 18 atanga 40 inkar 2613 (80%) an ni a. An mi man zinga 2803 (87.3%) chu mipa niin, hmeichhia 407 (12.7%) an ni.
Man ho zinga zaa 96 chu India mi an ni a, heng zinga zaa 92 (2833) chu Mizoram chhung mi an ni. Pawikhawih thlenna tam ber pawh pawikhawihtute awmna khua/veng/ district chhungah niin, zaa 83 chu hetiang mi hi an ni.
Mizoram mi tih loha Mizoram chhunga pawikhawihnaa man tam ber chu Assam mi niin, 158 (5%) an ni a, Myanmar mi 131 (4%) awmin, thenawm state dang – Manipur (44) leh Trripura (24) chu a tam zual leh deuh an ni.
Zirnaa an thlen chin lamah, mi 1012 (32%) chu pawl 9 emaw 10 emaw thleng chauh an ni a; mi 937 (29%) chu pawl 6 atanga 8 inkar thleng chauh zir an ni. Heng mi hi a tam ber niin, man ho zawng zawng atanga zaa 61 (1949) an ni.
Mi 217 (7%) chu school kal lo an ni a; 419 (13%) chu pawl 5 thleng chauh rap, 442 (14%) chu pawl 11/ 12 rap kai ve niin, 154 (5%) chu college kal – graduate an ni a; 29 (1%) chu post graduate kai thleng an ni.
Hnathawh leh eizawnna lamah, a tam ber 2167 (67.5%) chu thiamthil em em pawh nei lo, ‘rem rem thawk’ tih ang chi – unskilled labour an ni a. 406 (32.6%) chu skilled labour niin, hnathawh nei lo hrim hrim 314 (9.8%) an ni a; 31 (1.0%) chu private hna thawk, 64 (2.0%) chu sawrkar hnuaia thawk, 228 (7.1%) chu mahnia puala eizawnna nei (self employed) an ni.
Sum lakluh/ hna nei zingah pawh a tam ber, 2481 (77.3%) chu hlawh tlemte te hlawh (lower income) nei an ni a; 337 (10.5%) pawh sum lakluh dinhmun tha em em chuang lo (lower middle income) an ni. Mi 268 (8.3%) chu hlawh ziaawm deuh (middle income) nei niin, 124 (3.9%) chu sum lakluh dinhmun tha – upper income nei pha an ni.
Zirchianna chuan, hnathawh leh sum lakluh dan thlirin, hna nghet mumal vawn nei lo, hlawh tlem te tea thawk zingah pawikhawihtu an tam zual tihna a ni tih a sawi.
Kum 2024 chhunga Mizoram Police hmalakna thenkhat:
8 Heroin kg. 80.856 an man a, a kaihhnawihah mi 388 manin thubuai 282 an ziaklut.
8 Methamphetamine kg. 627.741 an man a, a kaihhnawihah mi 51 manin thubuai 30 ziahluh a ni.
8 Crystal Meth kg. 35.155 manin a kaihhnawihah mi 3 an man a, thubuai 4 an ziaklut.
8 Heng bakah hian ruihna atana hman thin damdawi mum leh a tui bakah ganja engemawzat an man a ni.
8 Tualchhuak zu (rakzu) litre 9956.585, a senchi um 4753 (IMFL), ramdang zu um 1514.5, Myanmar zu (BEDC) litre 469, beer bur 19665 leh litre 1040 a man a ni. Hemi kaihhnawiah hian thubuai 187 ziahluh niin, mihring 226 man an ni
8 Dan loa ram dang atanga kuhva tawlh kg 13,01,693, Rs. 17,54,72,900 hu an man a, thubuai pakhat ziahluh niin, mihring 179 man an ni. Kuhva tawlh chungchangah hian police-in thubuai a siamsak lohte hi Custom Preventive Force leh district deputy commissioner-te kutah an hlan a ni.
8 Silai chi hrang 33, silaimu 58227, ulhbun mu 170 (12 gauge), 4.8mm cartridge 7, pellet 245, silaimu siam zawh loh 4, pistol magazine 8 leh rifle magazine 2 man a ni a. Hemi kaihhnawihah hian thubuai 30 ziahluh niin, mihring 29 (India mi 19 leh ramdang mi 10) man an ni.
8 2024 November 30 thleng khan Mizoram Police chuan puakthei thil, gelatin tlawn 26446, gelatin kep 59827, fuse 6, neo gel 90 gelatin 1786, cortex metre 7125, PEK(Plastic Explosive Kirkee) 1200 (bawm 6), safety fuse metre 1907.3, 12 gauge cartridges 20 leh Cart SP pt.22 long rifle ball 50 a man a. Hemi kaihhnawihah hian thubuai 17 ziaklutin, mihring 27 man an ni.
8 Suma inbumna thil avangin mi hrang leh thubuai hrang hrangah belhkhawmin cheng nuai 92.61 khawih chet theih loha hren a ni a, internet kaltlanga inbumna (cyber crime) thilah Cyber Crime Police Station chuan a belhkhawmin Rs. 89,61,995 a man/ hmuh let sak a ni. Heng bakah hian sum leh paia inbumna avangin mobile phone 106 chu khawih theih loha block a ni.
8 Mizoram Police chuan General Parliamentary Elections 2024-ah heng state – Bihar, Uttar Pradesh, Madhya Pradesh, Delhi leh Punjab ten ralmuang leh felfai taka inthlan an kalpui theihnan a mi leh sa, company 15 (mi 1047) tir chhuakin, hlawhtling takin inthlan neihpui an ni. Jharkhand State General Assembly Elections 2024 atan company 8 (mi 553) tir bawkin, inthlan muanawm leh hlawhtling tak neihpui a ni.
Pawikhawihtu tam ber kum 30 hnuailam College kai lo leh sum lakluh tlem an tam
