Daily Newspaper

Pawisaah Maradona thlalak

8

Chawlhkar hnih liam taah heart attack vanga boral Maradona chuan ui a hlawh chhunzawm zel a. Argentina senator pakhat Norma Durango chuan an ram pawisaah Maradona thlalak nem kai a rawt.

Pawisaa Maradona thlalak nemkai rawttu Norma Durango hi Maradona kohhran ‘Maradonian Church The hand of God’ member zing a mi a ni a. Anni huna thawhtan, vawiin hian Congress-ah he rawtna hi a pu lut dawn. A rawtnaah chuan khawvel mihring piang tawh zinga footballer ropui ber anga ngaih Diego Maradona thlalak hi an ram pawisaa note lian ber Peso 1000-ah nemkai a rawt a ni. Peso 100 note lemah chuan Maradona thlalak hi nemkai a lo ni tawh a, an ram pawisa tak takah ngei nemkai turin rawtna awm hi ngaihtuah ho a ni ang.

Norma Durango rawtna hi Congress ah sawiho a ni ang a, a tlang hlauh a nih chuan kum thar tir lamah an hmang hman tura ngaih a ni a. Pawisa ah England laka goal ropui a thun tuma a thlalak khan an nemkai a rinawm. Indona muala an hneh loh England chu khelmual chhungah an hmachhawn a, Maradona goal sawi hlawh pakhat leh goal ropui chungchuang pakhat hmangin 2-1 in an hneh. Hemi tuma Maradona goal hmasa zawk hi ‘Goal tenawm ber’ tiin hriat zui a ni a. A goal hnuhnung zawk erawh chu ‘Goal ropui ber’ tiin hriat zui a ni ve thung.

Maradona hian Argentina tan vawi 91 khel in, goal 34 a thun a, kum 198 World Cup-ah a champion pui a, 1990 World Cup-ah final a hruai thleng bawk. Serie A club tenau Napoli chawi lian a, Serie A-ah a champion pui hial vangin Naples khaw mite chuan Pathian tlukna an ngaihsan Maradona hian an ram pawisaa a thlalak chuan hi a phu hle nia ngaitu tam tak an awm.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy