Pawngsual thubuaia tham chang Mendy

Pawngsual thubuaia tham chang Mendy
Manchester City defender hlui Benjamin Mendy chuan pawngsual thubuaia thiam a chan atanga ni nga lek hnuah Ligue 1 club Lorient tana khel turin kum hnih daih contract a ziak.
Kum 29 mi hian City thuam inbel chungin kum 2018, 2019 leh 2021 khan Premier League title a lo sualchhuak tawh a; kumin nipui thawt rual khan Etihad club-a a contract hmang zoin, tunah French club nen hian kum hnih atan inrem-na an ziak fel ta a ni.
Karliamta Zirtawpni mai khan England rama Chester Crown Court-ah Mendy hian pawngsuala puhna thubuai atangin thiam a chang hlimhlawt a, professional football buaipui zui turin hun tha a nei leh thei hram.
He mihang left-back hi hmeichhe pakhatin vawiruk lai pawngsuala a puh bakah midangin pawngsual tumah puh bawkin, thla nga lung ina tantir a nih hnuah court chuan thiam changin a chhuahzalen ta a ni.
Khatia puh hming-chhiat a nih lai khan Netherlands forward Memphis Depay leh Real Madrid forward Vinicius Jr-te chuan social media kaltlangin Mendy an thlawp thu hi an tarchhuak.
Kum 2017-a Man-chester City-in Monaco atanga pound mak-taduai 52-a an lei lai khan Mendy hi khaw-vela man to ber a ni a; an lakluh hlimah City director of football Txiki Begiristain chuan khawvela full-back tha berte zinga pakhat a nih thu hialin a fak.
City-a a season khat-naah Premier League title lakpui nghalin, club lamah a chetha bawk a, Russia rama 2018 World Cup khel tur France squad-ah koh a ni ta hial a ni.
A hringnunah hun khirh takin a tlakbuak zui tak avangin August 2021 daih tawha City-in To-ttenham Hotspur an luh-khung tum kha a com-petitive football khelh hnuhnunber a la ni ta rih.
A club thar Lorient hi season liamta khan Ligue 1 lamah 10-na niin, French club chuan thu-chhhuah an siamah French football-a Mendy kirleh lawmawm an tih thu sawi chungin, “Ben-jamin Mendy, world champion 2018, Man-chester City thuam inbel chunga Premier League title pathum hawn tawh, Monaco tana a khelh laia French champion lo ni tawh bawk chu season thara Lorient thuamchak tura sengluh a ni,” tiin.
Lorient thuchhuah hian France interna-tional chuan an club-a khel tura medical a paltlang tawh thu leh number five shirt a hak tur thu an tarlang a, nimin, Nilaini kha an club training ground-a a inlan tan hun tura an ruat a ni.
He French club hian August ni 5 khian pre-season friendly-ah mualneitu Bournemouth an infiampui dawn a; August ni 13-a league season bul an tanna inkhelah champion lai Paris St-Germain an luhkhung ang.