Pawngsuala puhnaah Jay-Z a tawngchhuak
Jay-Z chuan hmeichhe pakhatin Sean ‘Diddy’ Combs nen an pawngsual rawn ni a a puhna chungchangah sum duh vanga dawta inpuhna a ni tiin thiam lohna engmah a neih loh thu sawiin, “Thudik chu hailan a ni ang,” a ti.
Alabama hmeichhe pakhatin Jay-Z leh Sean ‘Diddy’ Combs ten an pawngsual rawn tiin a chungchang tarlanna ‘99 Problems’ tihah a ziak a, Jay-Z, a hming tak Shawn Carter chuan, “Hetiang thil hi a tleng lo hrim hrim. Rorelna dik tak a rawn lang thuai ang. Hneh tur ni lovin, hneh sain kan bei dawn a ni. He thil hi a intan hmaa tawp tawh ang vel a ni,” tiin he inpuhnaah hian a fihlim thu a puang.
Jay-Z ukil Alex Spiro chuan, “Ukil ve lemin hetiang khawpa inpuhna lianthamah tan chhan tur mumal nei lova thu a kalpui mai hian min barakhaih zawk a ni, chanchinthar thehdarhtu te hnena dawt thu an tidarh hian an dinhmun a tichhe lezual dawn a ni,” tiin Jay-Z puhtu ukil te chetdan mak a tih thu a sawi ve bawk.
He lawsuit-ah hian Alabama lam chhuak hmeichhe pakhat hian Carter leh Combs te hian 2000 khan MTV Video Music Awards after-party an neihna New York-ah zahmawh rawngkaiin an sawngbawl lui niin a tarlang a, chumi hnuah an bul hnaia gas station (petrol pump)-ah tlanchhiain, a pa koin a inhruai haw tir ta niin a sawi.
Hetianga a nih lai hian NBC News-in an chhui zauna, December ni 13-a an tihchhuahah chuan hmeichhe pa hian hetiang thil thlen hnua a fanu a hruai haw awm hi a ngaihtuah chhuak zo tawh lo niin a sawi a, pawngsual tawk ni a insawiin an party-naa milar hmeichhe pakhat a bia ni a a sawi pawhin hetiang hunlai hian New York-ah a awm lo ni a a sawi thu NBC News chuan an tarlang bawk.
Pawngsuala puhnaah Jay-Z a \awngchhuak
