Peace committee-ah Biren tel duh lo bur

Centre-in Manipur-a remna awm theih nana peace committee a din hnu lawkah Kuki aiawhte chuan Chief Minister N. Biren Singh leh amah thlawptute committee-ah an awm avangin an pawm loh tur thu an sawi nghal a. Committee din a nihna kawngah an ngaihdan lak a nih loh thu sawiin Centre chu inbiakna boruak tha a awm theih nana hma la turin an ngiat bawk.
June 10 khan Ministry of Home Affairs (MHA) chuan ethnic group hrang hrangte nena inremna a awm theih nan Manipur buaina chinfel nan committee a din a. Governor Anusuyia Ukey chuan committee member 51 awmna hi kaihruai dawnin chung zingah chuan Biren Singh pawh a tel a ni.
Panel member atana ruat thenkhatte chuan an remtihna pawh la hmasa lova ruat tawp an nih thu an sawi a. Chung zingah chuan Kuki Inpi Manipur (KIM) president Ajang Khongsai pawh telin peace talks neihnaah Manipur sorkar nena an thut tlan theih loh tur thu a sawi.
“Panel zingah hian COCOMI (Coordinating Committee on Manipur Integrity, a civil society group in Imphal) te Kukis te laka indona puang tute an tel a. Remna chu kan duh ngei e, mahse, tun dinhmun tharum thawhna thlen zui zel lai hian Manipur sorkar nena inbiakna neih kan thei lo,” tiin Khongsai chuan a sawi.
Retired Indian Defence Accounts Service (IDAS), J. Lhungdim pawhin a remtihna la hmasa hauh lovin committee-ah telh a nih ngawt thu a sawi bawk a.
“Kum 2016 khan Russia-ah arms deal chingfel tura tirhin ka awm a. Sorkar hna kum 37 ka thawh chhungin chief minister-in foreigner tiin min chhal a nia. He panel hi Central government officials-in a kaihruai tur a ni a, chutiang a nih loh chuan awmzia a nei dawn lo. He issue a thla a thla a inmung hi a zahthlak a ni,” tiin kum 2020 a retired tawh Lhungdim chuan a sawi.
Panel zingah hian Manipur Director General of Police P. Doungel, June 1 a post siam chawp Officer on Special Duty (OSD) Home chelh tura dah thar pawh a tel a. Doungel hi tun thla hian chawl tawh tur a ni a, May 3-a ethnic violence chhuah hnu khan hnawlin a awm zui char char a ni.
Member zingah hian Manipur tribal minister ni mek Nemcha Kipgen pawh a tel a ni.
All Manipur United Clubs Organisation (AMUCO) president Nando Luwang chuan panel zingah a hming telh a ni chu a hriat loh thu sawiin mahse hmalakna duhawm tiin a sawi a. “Group member dangte nena sawihona kan neih hnuah meeting a tel leh tel loh turah thutlukna kan siam ang,” tiin a sawi.
Eminent theatre artiste Ratan Thiyam, June 10-a Imphal-a lungawilohna lantirtu chu Centre hmalakna tharah hian peace panel-ah dah a ni a. Coordinating Committee on Cultural Fraternity tena lungawilohna an lantirnaah Thiyam chuan Manipur buainaa Prime Minister Narendra Modi ngawi tlat chu a hriatthiam loh thu a sawi.
May 3-a buaina chhuak avangin Manipur-ah mi 100 chuangin nunna an chan phah tawh a. Mi 50,000 chuangin in leh lo chhuahsanin police station atangin ralthuam 4,000 vel rukchhuahin a awm bawk.
MHA chuan thuchhuah a siamah peace committee chuan Manipur state-a hnam hrang hrang inkarah inremna a awm theih nan hma a la ang a, inbiakna awm theih nan te buaina chinfelna kawngah hma a la ang tiin a sawi.
Indigenous Tribal Leaders’ Forum te chuan peace committee din a nih hmain buaina nasa lutuk a ziaawm phawt a ngai an ti thung a. “Inremna mamawh a ni a, chutih lai kara tuna buaina bultumtu ber CM N. Biren Singh Peace Committee-a dah hi kan dem a ni,” an ti bawk.
Hei mai bakah hian Chief Minister ber chu Kuki-Zo community te drugs tawlhru, firfiak leh illegal immigrants te tia sawia tharum thawhna tizualkaitu tiin an sawi bawk.
Forum te chuan Meitei misual te leh State police tena Kuki-Zo tribal ram an beih zel loh nan President’s Rule-a Manipur dah nghal an ngiat bawk a.
“Chief Minister thusawi leh Kuki-Zo community a huatna sawi vangin leh Kuki-Zo cuommunity te chu drugs tawlhru, firiak leh illegal immigrants tia a sawi fovin Meitei Leepun chief, Pramot Singh an langsar taka national media a genocide a puan te, Meitei group COCOMI leh radical group Arambai Tengngol leh Meitei Leepun tena ‘Chin-Kuki Narco terrorism’ proxy war an puan chu a hliah zawk a ni,” tiin an sawi bawk.
Forum te chuan inremna awm se an duh thu sawiin chutih rual chuan ‘Meitei misual’ tena Kuki-Zomi khua an beih reng chu an en liam thei lo an ti bawk a. Kuki-Zo khua 160 chuang halin a awm tawh a, “Meitei misual te State police tena an thlawp te” thiltih a ni an ti bawk.