Pele goal record khumtu Neymar
Brazil tana goal 77 khung tling Pele nen he ram tana goal khung hnember an nihdun reng hnuah kartawp khan 5-1-a Bolivia an sawp tuma goal hnih thun chungin Neymar chuan record intawm thawhsanin a malkhalh a, Brazil football federation (CBF) hnen atangin lawmpuina leh hriatpuina a dawng nghe nghe.
Kum 31 mi Neymar hian Inrinni World Cup qualifying match khelh hma thleng khan Pele record hi a nihrual a, Bolivia game-a record thar mahnia pumbilh thei thei a nih inhre chungin khelmual a lut a; penalty a thelh zet hnu second half-ah goal hnih thawhin, ti hian, Brazilian national team tana match 125 a khelhah goal 79 a puitlin a, Brazilian mipa footballer zinga ram tana goal khung hnember a mal nih ta.
Inkhelh banah chutiang record hlu bik chu a chanpual a ni ang tih a suangtuah phak ngai loh thu sawi chungin a inngaihtlawmna a lantir a, Pele emaw national team-a player dangte emaw aia a that bik loh thu a sawi phal.
Brazil women’s team tana match 189 khela goal 122 thuntu Marta chu mipa leh hmeichhia sawi loa Brazil tana goal thun hnember a ni.
Nikum December thlaa kum 82 mi nia thi ta Pele khan kum 1957 atanga 1971 chhung khan game 92 khelin ram tan goal 77 a puitlin a, footballer piangchhuak tawh zawng zawng zinga thiambera ngaitu an thahnem hle.
Amah awm tawh lo mah se a social media platform official account X kaltlangin Neymar lawmpuina tihchhuah niin, “Brazil tana goal khung hnem kawnga King i khum tak avangin Neymar kan lawmpui che a, Pele pawhin vawiin hian a lawmpui che a ni,” tiin.
Brazil coach Fernando Diniz pawhin Neymar fak chungin, idol lian a nih thu leh chu chu mipui pawhin hriatpuia an pawmpui ngei a ngaih thu a sawi.
Kum 2017-a Barcelona chhuahsana pound maktaduai 200 tehrenga Paris St-Germain a zawm lai khan khawvela player man to ber a lo ni tawh a, kumin nipui lai khan Saudi Pro League team Al-Hilal a zawm ta a ni.
Inkhel dangah Uruguay pawhin hnehnain South American qualifying campaign an tan a, an coach thar leh Leeds United boss hlui ni bawk Marcelo Bielsa hoin Chile lakah 3-1 hnehna an chang.
Pele goal record khumtu Neymar
