Daily Newspaper

Pele record tluk zana Messi goal-in Barca chhan zo lo

6

Lionel Messi chuan a career-ah Barcelona tan goal 643 thun tlingin, club pakhat tana goal khung hnember ni reng thin Pele record tluk hial mah se Inrinni zanah Barcelona a chakpui zo lo a, an mikhual Valencia nen sihnih ve ve thunin an inhneh-tawk leh ringawt.

Camp Nou inkhelah Barca captain hia penalty a khung lo a, first half hun pekbelhah an siphurh sutna goal a thun a, a team chakpui zo lo mah se mimalin mellung pawimawh a phun leh ta tho a ni.

Valencia hian darkar chanve khelh tlin dawnah Mouctar Diakhaby goal hmangin hma an hruai zet a, tarlan tak angin, Argentine Messi chuan chawlh-lawk hma chiahin mualneitu team siphurh a sut a; second half-ah erawh Barca lamin goal an khung hmasa ve ta thung a, he goal hi defender Ronald Araujo tihluh niin, Catalan team hian an hmahruaina an hloh har lo a, minute 70 an khelh tlin hmain Maxi Gomez chuan Gaya siamsak atangin Valancia siphurh a sut a, a zawna league game thum chak zawn tum Ronald Koeman-a team-in an kawtkaiah point thum an hlawhchhuak zo lo.

First half tawp dawnah hian Antoine Griezmann hnunga na lo taka a nem avangin Valencia player Jose Gaya chu red card pek niin, penalty a chawi bawk a, mahse, referee-in VAR a rawn hnuah red card hi yellow card-ah tihhniam niin, penalty erawh a ding tlang ta tho a; Messi a lo penchhuak a, Valencia keeper Jaume Domenech chuan Barca captain penalty chhuih a dang zet a, mahse, Jordi Alba thawhrah atangin Messi chuan an siphurh sutna leh mimala a mellung pawimawh phunna goal a khung zui ta tho a ni.

Lionel Messi hma zawnga club pakhat tana goal thun hnember chu Brazil club Santos tana goal 643 puitlintu Brazilian great Pele kha a ni a, kum 33 mi South American ve bawk Messi hian goal thunna’na a hman zen zen loh a lu hmangin Inrinni zanah goal a tauhlut a, footballer piangchhuak tawh zawng zawng zinga thiamber titu ngah tak Pele hnung a zui ve ta a ni.

Pele hian Santos tana compe-titive game 665 a khelhah goal 643 thun tlingin, Messi hian Barca tana match 748 a khelhah Brazilian thun zat a nihrualpui thei a; heti zat goal puitlin tur hian Pele chuan season 19 a duh a, Messi chuan season 17-ah mellung a phun hman thung.

Kum 80 mi ni tawh Pele hian kum 1956 daih tawh khan rawlthar kum 15 mi lek ni chungin Santos tan a inlan tan a, kum 1974-a a chhuah thleng khan a club hlun chu Brazilian league title paruk bakah Copa Libertadores title pahnih a lakpui hman a, Copa Libertadores hi South America khawmualpuia club inelna sangber niin, an Champions League ve a ni.

Kum 2004 khan Messi hian rawlthar kum 17 mi ni chungin a Barcelona debut a nghakchhuak a, tun thleng hian La Liga title 10 lakpui tawhin, Uefa Champions League trophy pali a hawnsak tawh bawk.

Inrinnia an chak zawh leh tak loh avangin La Liga table-ah Barcelona chuan pangana an luah chhunzawm a; khelh 13-ah point 21 nei tawhin, hmahruaitu Atletico Madrid nen point riat ngawtin an inthlau.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy