Daily Newspaper

Peng Shuai a pha leh si!

21

Chinese tennis player Peng Shuai chuan social media kal-tlangin China communist sawr-kara an hruaitu lawk, an vice premier hlui Zhang Gaoli chuan tihluihnain a mutpui tih khawvel hriatah a puang a; a hnu lawkah a thuziak chu thaiboin, amah pawh vantlang hmuh theih loh turin a bo nghal.

Khawvelin a chanchin an ngaihven a, a bikin hmeichhe tennis thuneitu sang ber Women’s Tennis Association (WTA) phei chuan Peng-i himna chungchang-ah na takin Chinese sawrkar an kar a, China rama tournament hmachhawp an neih zawng zawng pawh thuleh awm hma atan an titawp fai vek a, mahse, puhna bengverh tak a puanzar hnua media a hmachhawn vawikhat-naah tunhnai khan tihluihnaa mutpui tih chu a pha leh si!

Peng hian Singaporean Chinese-language newspaper Lianhe Zaobao an tihin video interview kaltlanga an kawmnaah online kaltlanga a post siam hmasakah khan thil hriatfuh tawk loh tamtak a awm tih sawiin, “Ziak leh tawngkain ka duh lo chung mipat hmeichhiatna min hman-pui tih ka tarlang ngai reng reng lo. He thu-ah hi chuan an uar uchuak mai mai a ni,” a ti!

Kumin November thla khan Peng-i hian Twitter khapna ram China-a he social media platform tlukpui an hman lar Weibo an tihah vice-premier hlui Zhang Gaoli chuan tihluihnain sex a hmanpui tih a tarchhuak ngei a, a hnu lawkah a thu post chu ‘delete’ leh nghalin, amah pawh a chin hriat lohin a awm zui ta a nih kha.

Chiang zawkin Peng-i thu leh hla kha tarlang ta ila, November ni 2 khan Peng hian Weibo-ah thumal 1,600 lai hmangin ‘post’ a siam a, Zhang-a hming pawh chiang taka tarlangin, an lo inhmelduh (romantic relationship) ve ngei thu leh tihluihnaa a mutpui zui tak thu sawiin, “Engvanginnge i lo letleh a, min rawn zawng-chhuaka i chenna ina min hruaia tihluihnaa min mutpui nge i nih,” tiin a chhuahchhal!

Peng-i bo nghal hmiah chungchangah khawvelin mi-hring dikna rahbehna ram China sawrkar a ringhlel nghal a, tennis chhungkua leh khawvel huap infiamna pawl lian ber berin thuchhuah an siam a, sawrkar liante pawh an tawng-chhuak a, China rama nakum Winter Olympic Games-a sawr-kar aiawh palai tirh tum lo pawh an awm nawk tawh.

A hnu deuhah China sawrkar chuan hmaiphihna ni ngei turin Beijing khaw restaurant pakhata Peng leh a coach leh an thian dangte chawl khawmawi lai thlalak an tichhuak zet a, a hnuah International Olympics Commi-ttee (IOC) president nen biak-hmuhtheihna kaltlangin an inbiaktir leh nghe nghe.

A lan danah Peng chu sawrkar lakah harsatna tawk lo angin an lantir a, amah pawhin IOC hruaitu lawk hnenah a him thu leh a chenna in lama a tawmbo thu a sawi a, mahse, khawvel ngaih a tha thei chuang lo a, communist sawrkar sawisel leh dodal zawnga tawngchhuak leh khawsate khuangcher bo hmak hmak thinna China ramah chuan Peng tan himna a awm tak tak an rinpui lo.

Pathianni video interview-a Peng-i’n a thusawi tawh a rawn sut lehte khan engtiang taka nawrna leh vauna nge a tawh ang tih chu khawvel zawhna a ni zui ta tho a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy