Accounts & Treasuries hnuaia Treasury office ho chuan Finance department thuchhuak bawhzuina kalzelah pensionert family pensioner physical verification an neih chhunzawm zel a. Thawhtanni leh Thawhlehni chhung khan mi 2500 vel an endik tawh.
Aizawl South Treasury lamin an chan tam avangin Thawhtanni khan mi an tamin intlar leh nghah chhung a rei hle a. Kum upa lam tan harsatna a awm theih deuh avangin Thawhlehni khan pensioner leh family pensioner-te an hahdam zawk theihna Assembly Annexe Conference Hall chhungah endik a ni a. Zing dar 9 atanga tanin, chhun dar 12 thlen hun pek chhungin zawhfel thawkhat a ni.
Accounts & Treasuries hotute sawi danin, Central Treasury Rules-in a phut angin, physical verification hi District Treasury Office-ah inlanin kumtin November-a neih tur a ni a. Mah se, Mizoramah chuan Mizoram Civil Pensioners Association nen inremsiamin anni’n verification hi vengtina an branch kutah dah a ni. Sawrkarin pension case dik lo endiknaa hma a lakna kalzelah Treasury office-a physical verification hi kumin bik atan neih tura ruahman a ni.
Aizawl North leh South Treasury officer-te sawi danin, department hrang hrang ni bik bitukin hun ruatsak an ni a. Pensioner lokalte token pek niin, tar chak lo emaw damlo chu endik hmasak zel an ni. Chhan hrang hrang avanga Treasury office-a inlan thei lo chu an awmhmunah endik tum an ni. Jeevan Praman kaltlanga Digital Life Certificate nei tan a hmuna kal a ngai lo tih an sawi bawk.
Sawrkar hmalaknaah hian dan dikloa pension la thahnem tak hmuhchhuah a ni tawh a. Mipui sum dik taka hman a nih theihnana hmalakna a ni tih hria in, pensioner leh an chhungte chu sawrkar hmalakna tawiawm tha turin an ngen tih an sawi a ni.
Pension case 2500 vel endik tawh
