Pension scheme thar kalpui thuai turin sawrkar kan ngen – MPCC

Pension scheme thar kalpui thuai turin sawrkar kan ngen – MPCC
Sawrkar laipuiin pension scheme thar a duan chu state tan pawha hman theih tura duan a nih angin, Mizoram sawrkarin a hnuaia hnathawkte hmantir thuai turin an ngen tih Congress party chuan an sawi.
MPCC thuchhuak chuan, kum 21 chhung hman tawh, Prime minister AB Vajpayee kaihhruai sawrkar laia siam New Pension Scheme (NPS) chu BJP kaihhruai NDA sawrkar chuan thiatin, tuna Congress-in manifesto-a a neih, Old Pension Scheme (OPS) nen inang tak ‘Unified Pension Scheme’ (UPS) a siam thar a, he scheme-ah hian sawrkar hnathawkten an pension hmaa an hlawh lak hnuhnun ber atanga zaa 50 chu pension atan an la zui thei tawh dawn tih a sawi a ni.
NDA sawrkarin sawrkar hnathawkte tana pawi leh tha lo tak, NPS hnawla Congress manifesto zulzuia UPS a kalpui tur chu lawmawm a tih thu MPCC hian sawiin, mipui hmasawnna leh hamthatna tur ruahmanna siam leh kalpuiah chuan Congress party bawk a chungnun zia pholannaah a ngai tih a sawi.
Assembly inthlan hnuhnung berah Congress-in manifesto-ah OPS kalpui leh a dah a; India ram state hrang hranga Congress sawrkar leh an tel vena sawrkarah chuan OPS hi an kalpui leh vek tawh tih a sawi a. A duh tan NPS hi hman theih tho a ni a, central-in state kutah a dah tih a sawi bawk.
‘Mizoram sawrkar hian engtin nge a kalpui dawn a la sawi loa, he pension scheme thar hi sawrkar hnathawkte tan a rang thei ang bera kalpui ngei kan beiseiin kan phut a ni,’ thuchhuah chuan a ti.
UPS hman tura tih hma hian Congress rorelna state panga chuan NPS hnawlin an hnathawkte chu an pension ruala an hlawh lak hnuhnun ber atanga 50% lak theihnaah an luhpui vek hman tih a sawi a ni.
* UPS hi Union Cabinet-in kumin August 24 khan a pawm a. Inflation trend milin dearness relief tihsan thin a ni ang. Sawrkar hnathawk a boralin a chhungten family pension 60% an la thei anga, retirement dawnah gratuity benefits lumpsum superanuation payout a la thei bawk. Hei bakah hian central hnuaia thawk, kum 10 chuang service tawh chuan a tlem berah thlatin pension Rs 10000 a la dawn a ni.
* Union Cabinet-in a pawm tak UPS hi 2025 April 1 atangin state-ten an duh a nih chuan an hmang tan thei. OPS leh UPS danglamna ber chu, OPS chu liabilities niin employees emaw employer-ten emaw contribution an neih a ngai loa, UPS erawh contributory scheme a ni dawn a, sawrkar hnathawkten an hlawh atangin 10% pe in sawrkarin 18.5% a tum dawn a ni.