Daily Newspaper

Pepe-a’n Gunners chakpui

32

Pathianni zana English Premier League-ah club liante an mualpho laiin Arsenal chuan an mualah hnehna an chang ve thung a; an player manto Nicolas Pepe chuan mawi zeta goal thunin an team a chakpui. Inkhel dangah West ham chuan si thum fai ngawtin Leicester City an sawp ve thung.

Arsenal hian EPL champion lai Liverpool an hneh loh hnu lawkin Carabao Cup atangin Liverpool hi an petchhuak zui leh zat a, Pathianni zana an mikhual Sheffield United hneh zui lehin season tharah an khel tha zui zelin, palina an luah mek.

Emirates Stadium-a inkhelah Arsenal hian khel tha in, ball chang tam mahse goal hlauhawm an siamchhuak tam thei lova, Lacazette aia lut Eddie N’Ketiah a hlauhawm thei lo. Captain Aubameyang tan ball tha an chhawpsak hleithei lo bawk nen darkar khat chuang zet goal an thun thei lo.

Hun rei tak goal a luh theih loh hnuin Arsenal an che fuh ta nge nge. Mawi zeta ball an inpekkual hnuin Belerin siamsak tha tak chu rawlthar Bukayo Saka chuan near post-ah chiang zetin a tauh goal a, hmahruaina goal a thun. Goal an thun hnuin an khel tha zui zel a, Pepe goal hmuh zui tur a awm. Arsenal player manto, beisei phak mang lo tak Nicolas Pepe hian chak zetin a khalh tlang a, far post-ah mawi zela thawlhlutin a pet goal a, an goal hnihna a thun. He goal hian manto taka lei tlak a nihzia a lantir chiang viau a ngaih a ni.

Si hnih faia hma an hruai hnuin Arsenal hian ze tha lo tak an lantir a, an inthlahdah niin a ngaih theih. Muallai leh an lamah ball an inpekual vak vak a, goal an nawr na lo hle. An lama ball an inpekual vak vak hi an tuar ta nge nge a, minute 84-naah David McGoldrick chuan mawi zetin a pet goal a, an si phurh a sut then ta nge nge. Goal an thun hnuin mikhual team an phur thar a, goal dang pawh an thun belh teuh hle a, derthawng tak chunga him hramin Arsenal chuan hnehna an chang a, point thum hlutak an hlawhchhuak ta a ni.

Pathianni zana inkhel dangah Etihad Stadium-ah ngei 5-1 ngawta Manchester City sawp thei Leicester City chuan an mual; King Power Stadium-ah London club West Ham United an mikhual a, si thum fai tehrenga tlawm in, an mualpho zui ve leh.

King Power Stadium-ah Hammers hi tha takin an inlan a, minute 14-na lekah Michail Antonio chuan hmahruaina goal a thun nghal. Minute 34-naah Pablo Fornals chuan an goal hnihna thun belh zui leh a, hun tawp dawn hnaih minute 83-naah Jarrod Bowen chuan an goal thumna thun zui ve lehin khualmualah point thum hlutak an hlawhchhuak a ni.

(THE AIZAWL POST – Infiamna)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy