Peru hnehtu Germany
Euro 2024 atana inbuatsaihna friendly match pakhatah Germany chuan Inrinni zan khan sihnih faiin Peru an hneh a; nakuma Europe ramte football-a inelna pui ber an thlen huna competitive team tha tak chhawpchhuah an tumna kawngah German-ho hi an intuaihriam tan mek a ni.
Tun kha nikum World Cup first round-a an tlak hnua Germany inkhelh leh vawikhatna niin, he match-ah hian an tih zen zen loh danin German-ho hian tlarhma lamah striker pahnih – Fuellkrug leh Timo Werner an chhawr a; attack lamah an hriam hraih a, a bikin, first half-ah an goal bawh a na zual.
Peru lam pawh hian an nawr ve reng a, an lam goal hnaiha ball a chen changin Germany hi an talbuai lek lek thin.
Kum 30 mi Fuellkrug chuan minute 12-na lekah Kai Havertz thawhrah atangin goal hmasa zawk a thun a; Germany World Cup group stage goal hnuhnungber khungtu pawh kha Fuellkrug bawk hi a ni.
Goal khat a chhuah hnuah Peru goalkeeper Pedro Gallese chuan tum hnih ngawt an lama lut tur pui takin a dang a, a hmasa zawk chu Florian Wirtz-a shot niin, a ball banper la fuhtu Werner-a goal tur a dansak zui leh bawk.
Nikum World Cup khelh tan hma ni reilote la awma a Germany debut nghakchhuak ve chiah Werder Bremen forward Fuellkrug bawk inlar lehin, first half minute 33-ah he inkhela a goal hnihna chu newcomer Marius Wolf ball chhawpsak tha zet atangin a tilut a, ram tana game nga a khelh tawhah a goal nga thunna chiah a ni nghal.
Substitute Serge Gnabry chuan goal kham tihperin, minute 68-ah Havertz chuan penalty a chhuih a, goal ban petperin, Germany goal khat dang lawm leh tur a tlawlh.
Germany hian March ni 28 khian Cologne khawpuiah Belgium an hma-chhawn leh ang.
Germany coach Hansi Flick chuan tlarhma lama a team hriam chhoh zel dan hmuh theiha a inlar thu sawiin, Peru game-ah thil tha hmuh tur tam tak awm mah se 100% chuan thil a la kal dik lo tih a sawi a, an pass pawh a la felfai tawk loh thu leh an ball chan an hloh fo thu tarlang chungin an fimkhur lehzual a tul thu a sawi.
German coach hian goal an chhuah lo kha team tana pawimawh lutuk leh an tum an hlenna pakhat a nih thu a tarlang tel.
Peru hnehtu Germany
![](https://theaizawlpost.org/wp-content/uploads/2023/03/peru.jpg)