Site icon The Aizawl Post

Peshawar bomb puakah mi 92 thi

Pakistan-a Peshawar province a mosque suicide bomb hmanga beihna avanga nunna chan chu mi 92 an tling tawh.
He mosque hi high-security police headquarter area huam chhunga awm niin bomb tipuaktu a luh theih chhan chhui mek a ni.
Pakistan PM leh leader dangte chuan an dem thu an sawi nghal a, tun hnaia Pakistan-a chhiatna rapthlak berte zinga tel pha a ni.

Pakistani Taliban te chuan an tih a nih loh thu an sawi a, a tirah erawh an commander pakhat chuan an tih a nih thu a sawi thung.

“Firfiak te hian Pakistan humhim tuma beitute beiin hlauhna tuh an tum a ni” tiin PM Shehbaz Sharif chuan a sawi.
Bomb hi a thawk na hle a, tihchhiat a ngahin ruang lakchhuah pawh a harsa hle a. Bomb puak avang han mi 100 chuangin hliam an tuar bawk.

Bomb puah lai hian a bul hnaiah police officer 300 atanga 400 vel an awm niin Peshawar police chief Muhammad Jiaz Khan chuan a sawi.

Mosque hi khawpuiah pawh security khauh ber berna hmun niin a awmna hi police headquarter leh intelligence leh counter-terrorism bureaus te awmna bul lawk a ni.

Sharif chuan he bomb tipuaktute hian ‘Islam sakhua nen inkaihhnawihna an nei lo’ tia sawiin, “Ram pum chuan fifiak sualna hi kan duh lo bur a ni,” tiin a sawi.

Pakistan Taliban, Afghanistan Taliban sorkar nena inzawmna nei lote nen nikum November thla khan inkahhai puan chu tihtawp a nih hnuah Pakistan-ah tharum thawhna a nasa tial tial a ni.

Nikum December thla pawh khan tuna Peshawar ang bawk hian hmar thlang lamah police station beiin mi 33-in nunna an chan phah tawh bawk.

Tuna bomb tihpuah hi chhuna mosque chhunga tawngtaina hun hman laia tihpuah a ni.

UN Secretary General Antonio Guterres chuan bomb tihpuah chu a dem thu sawiin pathian biakna hmuna bomb tihpuah chu demawm a tih thu a sawi.

Exit mobile version