Ethanol 20 per cent nena pawlh petrol chu thawhtanni, February 6, 2023 khan State 11 leh union territories-a pump 11-ah pekchhuah tan a ni a, hei hi emission tihhniam nana biofuels hman nasat zel leh foreign exchange tihek em em fuel chawkluh tihtlem zel nana hmalakna kal zel a ni.
Tun dinhmunah ethanol 10 per cent chu petrol nen (10 per cent ethanol, 90 per cent petrol) chawhpawlh a ni a, sorkar chuan kum 2025-ah chuan a leta tihpun hman a tum a ni.
Prime Minister Narendra Modi chuan ethanol-blended petrol hi April thlaa India Energy Week (IEW) 2023 a tlangzarh tuma ruahman aia hma thla hnihah a tlangzarh ta a ni.
“Petrol a ethanol pawlh hi kum 2014 khan 1.5 per cent chauh a ni a, tunah chuan 10 per cent kan pawlh tawh a, 20 per cent pawlh thei turin hma kan la mek zel a ni,” tiin Modi chuan a sawi.
A thawh khatnaah khawpui 15 thur hmasak tum bawk niin kum hnih chhungin ram pum tuam hman tum a ni bawk a.
India chuan 10 per cent ethanol pawlh vang ringawt hian forex ah Rs 53,894 crore a hum thei dawn a, chu mai bakah loneituten hlawkna an tel phah dawn bawk.
E-20 (petrol leh ethanol 20 per cent chawhpawlh) hi 11 States/UTs a State-owned fuel retailers te petrol pump 84 ah lei theihin a awm dawn a ni.
Oil Minister Hardeep Singh Puri chuan India chuan June 2022 daih tawh khan petrol a ethanol 10 per cent pawlha a himzia an lo hmuchhuak tawh tiin a sawi.
“Kum 2025-ah E20 blended petrol chu hralh chhuah hman tum a ni bawk a, kum 2030 target hma daihin kan tifel thei dawn a ni,” tia sawiin, E20 chu pilot basis-in hun tiam hma daihin hralh chhuah tan a ni tawh, a ti a.
“Economy lama hmasawn chak tak ram kan nih avangin India chuan tun hnai kum sawm hnih chhungin energy demand a nei sang hle a, khawvel puma energy demand atanga 28 per cent lai chu India demand a ni,” tiin Puri chuan a sawi bawk a.
Sugarcane bakah broken rice leh agri produce tanga siam chhuah ethanol hian khawvela oil hman hnem ber pathumna ram leh ram dang oil chawkluha innghat bur India chu a pui nasa thei viau tura ngaih a ni a. India hian tun dinhmunah a oil mamawh 85 per cent chu ram dang atangin a chawlut a ni.
E20 hman hian two wheeler atanga carbon monoxide emission chu 50 per cent velin a titlem thei dawn a, petrol hmang four wheel ah chuan 30 per cent velin a titlem thei dawn thung. Two-wheeler leh passenger car atanga hydrocarbon emission chu 20 per cent velin a tihniam thei tura ngaih a ni bawk.
India hian crude oil chawkluh nan kum 2021-22 khan USD 120.7 billion a seng a. Tun sorkar kum hman mekah thla kua chhungin (April 2022-December 2022) USD 125 billion a seng der tawh bawk.
Nikum November 30, 2022 thleng khan petrol a pawlh tur ethanol 440 crore litre siamchhuaha pawlh a ni tawh a. Nakum atan chuan 540 crore litres tharchhuah hman tum a ni bawk.
November 2022 kha petrol a ethanol 10 per cent pawlh hman hun tiam niin mahse June, 2023 khan an tihhlawhtling hman daih zawk a. He hlawhtlinna avang hian sorkar chuan petrol-a ethanol 20 per cent pawlh tur target a siam kum 2030 chu kum 2025-ah a tihniam zui bawk.
He hmalakna hian sugarcane chingtute tan sum lakluh belhna a siam bawk a. Tun hnai kum riat chhungin enthanol supplier te chuan Rs 81,796 crore lai an leichhuak a, loneitute chuan Rs 49,078 crore an hmuh belh phah bawk. India-in foreign exchange a sum chhuak tur Rs 53,894 crore a hum theih phah bawk a. Carbon-dioxide (CO2) emissions 318 lakh tonnes in a tihniam bawk.
E20 tlangzarh pah hian Green Mobility Rally huaihawt a ni bawk a, hei hi IEW-23 hnuaia India rama green fuels hman uar a nih theih nana hmalakna kal zel a ni bawk.
Automobile engine te hi E-20 hmangin engine tlema siam danglamin harsatna engmah awm lova tlan thei a ni a.
Sorkar chuan ethanol man hi kum 2014 atang khan bithliah a siam tan a, kum 2018 atang phei kha chuan ethanol man hrang hrang a production azirin bithliah a siam tawh a ni.
Sorkar thutlukna hian ethanol supply lam a tipung nasa a, public sector oil marketing companies (OMCs) tena ethanol an lei chu a tipung nasa bawk.
Tun dinhmunah kum khatah India-in ethanol hi 1,037 crore litres vel a tharchhuak thei a, heng zinga 700 crore litre chu molasses-based niin 337 crore litre chu garian-based a ni thung.
Oil PSUs te chuan second generation (2G) ethanol bio-refineries, Panipat (Haryana), Bathinda (Punjab) leh Bargarh (Odisha), ah te production capacity of 100 kilo litre per day (KLPD) leh Numaligarh (Assam) ah production capacity of 185 KLPD te an din tawh bawk a ni.