Meghalaya khawpui, Shillong-a Directorate of Mineral Resources (DMR) pisa chu petrol bomb hmanga vawm niin a bula car ding a kang chhia.
Police chuan pisa beih hi tlai dar 3.32 niin a chhungah thawktute pawh an awm niin an sawi.
Chief Minister Conrad K Sangma chuan chief secretary leh sorkar hotu lian dangte nen an tlawh nghal a. Lirthei chhia pawh a tih dan tur ngaihtuah nghal tur an nih thu leh DMR pisa leh sorkar hmunhma dangah CCTV camera tam zawk mamawh a nih thu a sawi bawk.
DMR Director MB Tongper chuan bomb pakhat hian DMR-a thawk car a fuh tih a sawi a. “Ka pindanah kan thutkhawm laiin thil puak ring deuh ka hria a. Car-in thil a su ni turah ka ngai a, ka’n en chuan kang ka hmu ta a, a hma lam atanga kang tan a ni,” a ti.
Car neitu hi pisa pawna a awm lai a nih thu leh minute 4/5 chhung vela thelh mih a nih thu a sawi a. Chief minister-in ngaihtuahsak a tiam chungchang sawiin Tongper-a chuan, “Car hi a mi mal ta a ni a, sorkarin zangnadawmna a pe ang,” a ti.
Police chuan Laitumkhrah Police Station-ah FIR pahnih an ziak lut a, pakhat hi DMR director hminga ziah niin pakhat hi car chhe ta hminga ziah luh a ni a. Tongper-a chuan hetiang hi an pisain a tawn vawi khatna a nih thu a sawi a, “A titu kan hre lo va, a tih chhan lah kan hre hek lo va. Police kan hrilh a, an chhui mek a ni,” a ti.
Ni li liamtaah khan mi tu tih hriat loh pahnihin petrol bomb pahnihin Shillong-a Laban Police Station an lo vawm tawh bawk a. Hemi tum hian police pahnih chu him hlauhvin an bula police lirthei erawh a chhe nual a. Police chuan CCTV-in thla a lo la fuh a, an chhui zui mek tih an sawi.
Petrol bomb-in Shillong-a DMR pisa vawm
