Daily Newspaper

Petrol tha lo leh LPG buk tling lo man

32

Legal Metrology Enforcement chuan Mizorama hman tur petrol tha lo leh LPG buk tling lo an man a, a phurtu hnamdang driver te pawh man tel an ni.

July 23 khan m/s Mizofed Petrol Pump Aizawla dah tur petrol phurtu tank lorry MZ-05 3804, a khalhtu I.Laskar, DhoninHari, Cachar district Assam chu a petrol quality a chhiat lutuk avangin a petrol phurh litres 12000 chu Legal Metrology hian an man a. Density quality test result atanga a landanin petrol-ah hian thildang (khawnvartui) pawlh nia a lan thu an sawi.

Motor Spirit & HSD (Regulation of Supply & Distribution and Prevention of Malpractices ) Order 2005 angin an man a, essential commodities a nih avangin dan anga hma lak turin Aizawl DC-ah thehluh a ni. Legal Metrology hian petrol leh diesel lo thlen apianga hrilhhre turin petrol pump manager-te an hriattir a, manager-te awmlaia endik a nih hnuah mipui hnena semchhuah turin unload thin a ni. Hei hi Legal Metrology inspector-te awmna hmunah chuan theihtawpa kenkawh a ni a, pump manager-te pawh density quality test a, a tlingte chauh mipui hnena pechhuak tura company guidelines nei sa vek an nih thu an sawi.

Legal Metrology Enforcement duty-te hian July 24 khan m/s V.Neihkunga Gas Agency-a dah tur, truck AS-11 AC-0115, a khalhtu Babul Hussein Laskar, truck neitu S.Ray, Silchar phurh LPG domestic cylinder bur 79 chu a buk a tlin loh avangin Legal Metrology Act 2009 hmangin an man a. Gas hi kalkawngah khawih chingpen nia a lan thu an sawi.

Dan angin driver chungah hian hremna lek a ni dawn tih Legal Metrology hotute chuan sawiin, gas bur buk tlinglo zawng hi IOC marketing guidelines angin agency-in plant-ah a thawn let vek anga, a man leh phurh man zawng zawng chu transporter-in a chawi tur a ni.

Gas agency te hi IOC marketing guidelines angin gas bur buk dik tak chauh mipui hnena sem tura hriattir an ni a. Hemi atan hian bukna pawh an kawl ngei tur a nih angin bukna endiksa an kawl vek a, mipui hnena buk tlinglo an pek chhuah chuan anmahni chungah hian LPG control order, Legal Metrology Act leh IOC marketing guidelines anga hrem theih an ni tih Legal Metrology hotute chuan an sawi.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy