Health minister Lalrinpuii chuan Zirtawpni khan Chandigarh-a Post Graduate Institute of Medical Education and Research (PGIMER) a tlawh a. He hmunah vek hian Zoram Medical College & Hospital-a lung lam enkawlnaa thawkte chu inzir belh turin an awm mek bawk.
Mizorama medical college – ZMC&H ah zirna quality a that chhoh zel theihna turin PGIMER nen teachers exchange programme neih leh students exchange programme neih theih dan tur Health minister hian a sawipui a. PGIMER director Dr Vivek Lal chuan ZMC&H nena thawh dun theih dan kawng awm ngei se a duh tih lo hrilhin, a rang thei ang bera inremna thuthlung ziah a duh tih a sawi. MD (Doctor of Medicine) course-ah sponsored seat an nei tih sawiin, Mizoram doctor zingah entrance exam paltlang thei awm tam se a duh tih a lo sawi a ni.
Zirtawpni vek khan ZMC&H-a lung lam enkawlna – Cardiothoracic and Vascular Surgery (CTVS) operation theatre, Intensive Care Unit leh Cath Labhawng tura hmalakna kalzelah inzir belhin doctor pakhat leh nursing officer pali chu PGIMER-ah hian an awm mek a. Advanced Cardiac Centre-a CTVS OT-ah anaethetist 1, nursing officer 2; CTVS ICU, CCU leh Cath Lab-a nursing officer 2 an ni.
Ni 30 chhung an training anga, an ni bakah hian ZMC&H-a nursing superintendent pahnih chuan department hrang hrang kalphung zirchiang turin kar hnih chhung hun an hmang dawn bawk.
PGIMER hi India rama medical lam zirna in pawimawh leh hlun a ni a. ‘Institute of National Importance’ tia hriat hlawh zing ami niin, khum pawh 2233 a awm a ni.
PGIMER nena thawhdun dan dap Inzir belhin ZMC atangin kal bawk
