Daily Newspaper

Phai atanga lakluh insum rih hi…

52

Horticulture, Commerce & Industries leh Mizofed kaltlangin thei leh thlai lei leh hralh dan tur duangtu atan Covid-19 Fruit & Vegetable Supply Chain Committee din a ni a. He committee ruahman hian thingtlanga thei leh thlai hralh tur neite leh Aizawl khawpui chhunga task force-te chu direct-in an indawr dawn a. Hetih rual hian phai lam atanga thlai lalut thinte pawh Mizorama thlai tharchhuah hun lai chuan lo insum hram hram turin leh thlai lalut rih lo turin an hrilh a.

Kan hriat angin, Covid hripui avangin eizawnna kalpui thei lovin kan chawl thuap a, Fur thlai tharchhuah hun lai nen a in-nang a, thlai leh thei tharchhuaktute tana sum lakluhna hun pawimawh tak a nih mek laiin, total lockdown puan te a han ngai leh rih a. Thingtlang lama thlai leh thei tharchhuaktuten an innghahna pui ber Aizawl khawpuiah total lockdown a ngaih avangin, kuthnathawktuten an tharchhuah dehral dan turah harsatna an tawk nghal a. Hetih laia sawrkarin supply chain a ruahman ta hi thil lawmawm tak a ni. Kan dinhmun han thlir hian, kumin chhung hi chu eizawnna kawng zawh mumal thei lovin kan tluan leh maiin a rinawm a, supply chain hi changtlung zawka ruahman chhoh zel a pawimawh dawn niin a lang.

Hetih lai hian, phai atanga thlai laluta eizawnna kalpuituten an eizawnna an chhunzawm theih dawn tak loh avang hian, heng mite dinhmun siamrem dan kawng zawnsak pawh hi a pawimawh tel nghal bawk dawn niin a lang.

Phai atanga thlai lakluh chungchangah hian, Mizorama thlai tharchhuaktute dinhmun nena enmil chunga ruahmanna siam hi nakim hun zelah pawh thil tihawm tak a ni awm e. Mizorama thlai leh thei tharchhuaktuten an tharchhuah tam ve hun lai hi chuan, Mizorama tharchhuah ang chi item te hi chu, phai atanga lakluh rih loh mai hi kalphunga neih rih te pawh a la tul dawn niin a lang. Keimahni a ram leilung fate kan invur ve theih hun lai hi chuan, kan tanrual thiam a tha hlein a rinawm.

Tun dinhmunah phei chuan, kan rama thlai leh thei tharchhuah tam hun laite a lo ni bawk nen, hri avanga fimkhurna kalpui a lo ngai tho bawk a, hri dona kawngah pawh phai lam dawr rih lova awm hi kan dinhmun hian a keng tel hrim hrim a tih theih awm e.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy