June ni 11-18, 2023 chhunga Panch-kula, Haryana-a khelh Yonex Sunrise 2nd Ashwini Gupta Memorial All India Sub-junior Ranking Badminton Tournament 2023-ah Mizo naupang Malsawmhlua (Mama) chu Under-15 Boy’s Doubles inelna huangah a champion!
Malsawmhlua s/o Albert Lalnun-hlima hi Serchhip naupang niin, Ralte Villa Badminton Club, Champhai tana khel mek a ni a, tunah hian Pullela Gopichand Badminton Academy (PGBA), Hyderabad-ah badminton zirin a awm mek a ni.
He tournament khelh zawh takah hian Andra Pradesh lam mi Mahendra Kalahasthi nen inkawpin, seeded no 2 ni chungin inelna an hmachhawn a; semi-final lut tur hian player tha tak tak hneh chhoin, semi-final match-ah hian Akhil Reddy Bobba leh Abhisek Bonu, Andra Pradesh tangdun an hneh a, final-ah he tournament-a seeded no 1, Arjun Tanaji Birajdar leh Aryan Tanaji Birajdar tangdun chu straight set (21-14, 21-18)-in an hneh leh a ni.
Mama hi NEIDA (Tata Trust), MBA leh MSSC-te thawhhonain badminton zirna atana an din Serchhip Regional Development Centre (RDC) atanga zirchhuak niin, he hmuna kum thum a zir hnuah kum 2021 November thla atang khan PGBA-ah a awm tan a, India rama naupang, badminton lama hmabak nei eng berte zinga mi a ni.
Mizoram Badminton Association (MBA) chuan Mama hlawhtlinna hi a chhuangin a lawmpui takzet a, Mizoram tihmingtha a, India player chhuanvawr ni chho zel turin duhsakna sang ber a hlan.
Phaitual badminton-ah Mizo naupang champion
