Daily Newspaper

Phaituala inkhel tur Mizoram volleyball team hnih

51

Volleyball Federation of India (VFI) buatsaihin December 25-30, 2021 chhung hian Burdwan, West Bengal-ah National Junior Volleyball Championship khelh a ni dawn a, Mizoram Volleyball Association (MVA) aiawha fehchhuak tur Mizoram mipa leh hmeichhe team inbuatsaihna chuan a vawrtawp thleng mekin, naktuk, Ningani hian Lengpui atangin Kolkata an pan ang.

VFI vice president leh MVA senior vice president ni bawk Dr. Lalmalsawma Nghaka chuan Mizoram team kalna tur atan ruahmanna hrang hrang a siampui.

Mipa team hi NIS coach Eric Pautu chuan enkawlin, TNT Muanna vengah camping neihpui an ni a, Dr. Sangthankimate’n Team Mizoram Boys camp hi an thleng a, an chungah MVA hruaitute’n lawmthu an sawi.

Team manager Ngura chuan hneh takin mamawh tul hrang hrang a ngaihtuahsak a, player te’n nuam an tiin, inbuatsaihna vawrtawp an thleng tawh a ni.

District dang atanga chhuakkhawm hmeichhe team player-te chu Mizoram Volleyball Association office, Tuikual North Indoor Stadium-ah camp pui an ni a, Aizawla awmte erawh mahni in lum atanga practice zawm phalsak an ni.

Tuikual North Indoor Stadium-ah hian hmeichhe team hi an coach Donald Khawlhring hoin ngawrh takin an inbuatsaih a; team manager Vida Hrahsel Saza chuan team mamawh hrang hrang a buaipui thung a ni.

Team Mizoram Boys & Girls-ah hian MVA chuan beiseina sang tak a nei a, medal la ngei tura ngaih leh beisei thlan-chhuahte an nih thu an sawi.

Kristiante hunpui kalsana inkhel tur an ni hi hrehawm ti viau mah se Pathian ram zauhna tur a nih ngei beiseiin, chutiang taka an khelh chhuah theihna’n leh sakhaw dangte entawn tlaka dinhmun sang taka an din theihna’n Mizoram mipuite’n nasa taka tawngtaipui turin MVA chuan a sawm.

Team Mizoram tracksuit hi John Lalpeka, GIG Motors neitupa leh MVA patron ni bawk chuan a tumsak a; hmeichhe jersey hi Women & Child Deve-lopment, Social Welfare chuan tumsakin, mipa jersey hi Joseph Construction neitu leh MVA executive member ni bawk K. Lalthanzama’n a tumsak thung.

Team Boys & Girls mawza hi Mizoram Volleyball Association executive member Lalchhuan-mawia (Machhuana), Tuikual North chuan a tum sak bawk.

Team Mizoram Volleyball hi Mizoram State Sports Council (MSSC) bultuma kal an ni dawn a, thilpek petu leh MSSC chungah MVA hruaitute’n lawmthu an sawi.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy