Pharmacist chauhin damdawi dawr nghak tura tihna CM-in siamthat tum

Pharmacist chauhin damdawi dawr
nghak tura tihna CM-in siamthat tum
Pharmacist chauhin damdawi dawr nghak tawh tura tihna chu tun dinhmunah la tlin lo deuh nia inhria in damdawi dawr neitute chuan chief minister hnenah an thlen a. He thilah hian lo mangang lo tur leh hetiang thil chhuah dawn chuan cabinet ngaihtuah tura chhawpchhuah tha a tih thu a lo hrilh tih sawi a ni.
Damdawi zuar pawl – Mizoram Chemists & Druggists Association (MCDA) chuan Thawhtanni khan chief minister Lalduhoma an hmu a. Health department hnuaia Food & Drugs Administration chuan 2025 January 1 khan circular tichhuakin, he thu chhuah ni atang hian damdawi dawr chu pharmacist-ten full time-in an thutchilh tawh tur a ni, tih a ni a. Hei hi tun dinhmunah pharmacist an la indaih loh em avang leh a awmchhunte pawhin rawih man sang tak leh to taka an inchhiar avangin damdawi zuarte tan harsatna awm thei, mipui a nghawng theih dan an hrilh.
Chief minister chuan harsatna awm thei tur hrang hrang ngaihtuahin, dan awmsa tibo chuang si loa, hma sawn zel tum chungin, he circular chhuah tawh chungchangah damdawi zuarte chu mangang lo tur leh thlamuang taka lo awm turin a ti tih MCDA hian sawiin, mipui nghawng leh tichiai thei tur ‘circular’ chhuah a nih dawn chuan officer-te pawhin amah rawn hmasa leh hriattir lo chuan thuchhuah siam lo se a duh thu leh a tul chuan cabinet meeting-ah a putluh mai tur thu a sawi tih sawiin, hei hian a tithlamuang hle tih an sawi a ni.
Veng kilkhawr leh thingtlang hmun tam taka damdawi zuarten an harsatna tawh ber, an damdawi kawl theih chin bituk pawh lo ennawn a, a tul anga list siamthat a nih tur thu chief minister hian a lo hrilh chu an lawm hle tih sawiin, hetihrual hian damdawi ruihtheih thil thehdarh leh hmansual theih kawnga damdawi zuar inhnamhnawih an awm chuan, chu’ng mite chu an dimdawi dawn lo tih a sawi chu MCDA chuan tha a ti a. Damdawi zawrh chu sumdawnna chikhat mai ni lo, mihring damna leh nunna kawng thlenga pawimawh tak a nih avanga fimkhur a ngaih bik thu a sawi pawh an pawm tih a sawi a ni.
MCDA sawi danin, tunah hian Mizoram Pharmacy Council-ah pharmacist inziaklut 1057 an awm a, valid registration nei 923 an ni. General drug licence nei 928 an awm a, pharmacist zingah regular-a sawrkar hnathawk, RIPAN, FDA mi 70 awmin, contractual-in National Health Mission-ah mi 95 an thawk. Heti chung hian pharmacist indaih lohna a la nasa a, Mizoram pumah damdawi zuar 4170 an awm mek a ni.