Philippine khawpuiah ei ruk duh lohna lian lantir

Philippine khawpuiah ei ruk duh lohna lian lantir
Philippine khawpui, Manila-ah ei rukna duh lo thinrim mi sang tel an pungkhawm a. An lungawi loh chhan zingah dollar tluklehdingawn eng emaw zat man tur tui lian thununna tur hna thawhnaah ei rukna pawh a tel.
A huaihawtute chuan Pathianni kha an rama ei rukna duh lohna punkhawm lian ber a nih an ring a, police leh sipaite pawh tharum thawhna a thlen palh hlauvin an inring hle bawk.
Asia chhimchhak lamah tun hnaiah tharum thawhna a thleng nasa a. Indonesia-ah pawh police chetna avang te, parliamentarian-te hlawh sang leh thil man sang lutuk duh lovin ram pumah lungawi lohna lantir a ni.
Manila-a pungkhawmte hian Philippine flag vaiin banner an tarah ‘a tawk tawh, a lutuk tawh, lung inah khung tur’ tiin an au va, kawng an zawh a, thil tisualtute hrem vek an phut.
Zirlai hruaitu pakhat, Althea Trinidad chuan, “Rethei takin kan awm a, an lirthei changkang te, ram danga an zinna leh sum lian tak taka sumdawngte nen an indawr nan chhiah sang tak chawiin kan in kan chân phah tawh,” tiin The Associated Press news agency hnenah a sawi.
“Mipuite hlamchhiah kan nih tawh loh nan kalphung thlak kan duh a ni,” a ti.
AFP news agency chuan Pathianni tuk khan Manila-a Luneta Park-ah chuan mi 13,000 an pungkhawm.
Mipuite hi President Ferdinand Marcos Jr-a’n kum tina State of the Nation thuchah a sawiah July thlaa a taka thawh awm lo hna a awm tih a sawi atangin an thinrim zual.
Marcos-a hian a chhuitu tur din a ni tih sawiin hei hi tui lian thununna tur hna 9,855 vel, peso tluklehdingawn 545 man vel a ni.
Mipuite hi Sarah leh Pacifico Discaya nupa, construction company tam tak neia tui lian thununna tur hna thawktu tura thlan, European leh US car leh SUV man to tak tak neitute lakah an thinrim zual.
Marcos-a hian mipuite thinrimna hi awm a ti hle a; mahse, muanawm taka che turin a ti a. President hian sipaite chu ‘inring reng’ turin a chah bawk.