Phone bo 28 hmuh let sak
Lunglei Police Station Cyber Cell hmalakna in, mobile phone bo leh ruk zawnchhuah hna ngawrh taka chhui hnua hmuh let mobile phone 28 chu November 1 khan a neitute hnena hlanlet a ni.
Lunglei addl SP K Beihmotaosa chuan Lunglei Police Station-a Cyber Cell hnenah thawhrimna avanga heti zat mobile phone bo hmuhlet a ni chu Cyber Cell lam fak tlak an ni tih a sawi a. A zawn chhuah hna chu thil awlai tak a ni lo tih a sawi. Mobile phone bo hi Lunglei mai ni lo, Mizoram leh India ram hmundangah a tam em em a, chuvangin Lunglei Police chuan te lua awmloin, mobile phone tibo report awm tawh phawt chu a tam thei ang ber theihtawpin chhuichhuah sak zel an tum tih a sawi a ni.
Tunlaiah information technology lama changkanna umphak ve zel a tul tih sawiin, tuna an hlawhtlinna pawh Central Equipment Identity Register (CEIR) portal awmze nei taka an hman tangkai vang a ni tih addl SP hian a. Mobile phone ruk nia rinhlelhawm tih hrereng chunga lo leisaktute emaw lo thleng tute emaw chungah pawh action an la zel dawn tih sawiin, tunhnaiah hetianga dik lo taka lo leitute hi man an nei nual tawh tih a sawi a ni.
Tuna mobile phone hmuhlet hi kumin September/ October thla chhunga chhuichhuah an ni. Lunglei Police chuan mipui chu mobile phone secondhand an lei dawn reng rengin, black list nge white list a nih tih finfiah hmasak phawt a him ber a; Google search hmangin CEIR portal emaw Cyber Crime portal emaw atangin awlsamtein tute tan pawh finfiah theih reng a ni tih an sawi.
Tun tuma phone bo an hmuh let sak hi a sumfaia chhutin Rs. 5,73,800 hu a ni a. Lunglei Police hian mobile bo leh ruk hi tun thlengin 98, Rs. 24,59,800 hu an hmuhlet sak tawh a, a neitute hnenah hlan leh vek a ni.
Phone bo 28 hmuh let sak
