Daily Newspaper

Phone hmai keh hmangtu Mane

37

Liverpool forward Sadio Mane hi kan hre theuh ang a, khelmual chhunga a chet dan chanchin ngaihnawm tluk zetin khelmual pawna a chanchin hi a ngaihnawm tel a, chu’ng zinga pakhat lek chu kan han chhawpchhuak ang e.

Senegal ramah rethei takin a lo piang a, harsa takin a seilian a, tunah chuan Liverpool khawpuiah nuamsa takin a khawsa tawh a, millionaire nun chen pha zinga pakhat a ni tawh.

Anfield club-in kum nga chhung atan pound 26,000,000 zetin an senglut a, kum khata a hlawh chawhrual hi pound 5,200,000 vel zet niin, nitin mobile phone changkang ber chi pawh lei thei a ni a, mahse, tunhnaiah phome hmai keh a hmang lai chu camera-in a la fuh a, lo nuihzat tawkte an awm a, chumi chungchanga a chhanna hi a ropui asin:

“Engvanginnge Ferrari car 10 ka neih ang? Lunghlua cheimawi sana bun chin 20 leh private jet pahnih ka nei ang maw?

“Tunhma chuan ka ril a tam ngawih ngawih thin a, hah takin lo lamah hna ka thawh a ngai a, indona rapthlak tak karah ka seilian a, ke lawngin football ka pet a, zirna (education) ka dawng pha lo a, nun nawmna zawng zawng tih theih deuh thaw hi ka ban phak lohah an awm a, mahse, vawiin chuan football vangin heti zat hi ka hlawhchhuak ve ta a, retheihnain a la bawhbeh reng ka chipuite ka tanpui ve thei ta asin.

“Sikul tam tak ka sa a, stadium pakhat ka khawrpum tawh a, rethei bakberha hringnun sual mekte tan sil leh fen, pheikhawk leh chaw ka pe a, hringnunin min pek atanga ka chipuite’n tlemte an lo dawn ve hi ka thlang zawk.”

Ni e, retheihna atanga sport-in engkim a pek kan hmuh tam zawkte hi chuan khawvela car chhuak thar ber ber an hung tlep tuar a, anmahni pualin thlawhtheihna an kawl ther fur a, sana man lo leh in ropui mangkhengah an cheng a, an sum ngahziate chu social medai lamahte an phochhuak lai kan hmu chamchi thin.

Chutiang mi chu kan sawi Sene-galese professional footballer Mane hi chu a ni ve miah lo a, millionaire a nih hnuah a nun hmasa a theihnghilh lo a, amah ang bawka retheihnain a bawhbeh a chipuite a hre reng a, phone hmai keh hmang chungin mite tan sum tamtak a thehchhuak ur ur a, he mihang footballer hian hringnun a man chiang e.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy