Daily Newspaper

PHUAHCHAWP PEACE BONUS

11

-Zothani

Tun lai chu political party-ten Peace Bonus te, Baffacos te an buaipui thar leh niin a lang a. Mau Tam laia Mizoram mipuiin kan hriat lar em em Peace Bonus chu Chief Minister Pu Zoramthanga chuan kum 10 chuang hnu-ah “A awm lo lutuk a, ka phuahchawp a ni ka tih kha..a awm lo reng reng a, ka phuahchawp a nia” tiin House-ah a sawi chhuak ta a. Mahse, chutia Chief Minister Pu Zoramthanga’n a phuahchawp a nih thu a sawi tuk lawkah a awmna party lamin Peace Bonus a awm thu leh sorkar laipui atanga lo kal official letter an rawn phawrh chhuak leh lawi a!

A hun laia MNF ten an chhuan leh an sawirik tam nen. Kum 10 chuang liam tawh thil kha a ni a. Hetia han sawi thar leh hian Mizoram tan hlawkna nei tak maw? Thil entir nei emaw, awmze awm emaw a ngaih tur ni lo, thil tak tak ni mang si lo, sawi thiam leh sawi tlawr vel avanga lawm tawk leh lungawi thin, inawi tlei thin an awm tihna a ni ber mai awm e. Chutiang chu tun lai pawhin a la awm reng a, an la hlimpuite chuan an la hlimpui tho a ni.

Dik tak chuan Peace Bonus an tih vul chuk lai pawh khan chutiangin sawrkar laipuiin Peace Bonus a rawn pe lo a, leiba rulhna tur te pawisa a rawn pe a ni titein mithiamte’n an sawi thin a. Chutianga mithiamte sawi chu a dikzia MNF lamin an pu thusawi ngaihtuah miah loin an rawn nemnghet leh ta a ni.

MNF lamin Sorkar laipui lehkha an rawn phawrh a lang chiang tak chu kha Peace Bonus sum, hmasawnna (development) hnathawhna atana lo kal emaw kan tih kha kan sum lo hmanral tawh siam rem nan, kan liabilities rulh nan tih a ni ta chauh mai. ` 82.45 crores kha a hman dan tur a sawi dan chuan “as one time non-plan Grant to enable the State Govt to tide over its financial problems and to discharge its committed non-plan liabilities” tih a ni ta daih mai a. Mipui lo beisei dan nen chuan chhim leh hmar angin alo peng ta a nih chu!!

Kha lehkha veka lo lang chiang chu 100 crore pawh kha RBI remtihna a kan lo hmanral tawh Ways and Means kan lo hman tawh grant anga min lehsakna (siamremna) chauh a ni a. NLCPR dang anga development-a hman tur a ni lo. Ministry lehkhaah khan ti hian chiang takin a inziak”…it has also been decided to CONVERT the extended WAYS & MEANS advance of `100 crores released on 31/3/2000 as grant” tih a ni.

Peace Bonus chu kum 10 aia tam kal ta ami kha a ni a, a kha tih lai pawh khan Budget head-ah a awm lo va, mahse, tlawr taka sawiin an lungawi em em tho va, Non Lapseable Central Pool of Resources (NLCPR) a ni tihte chu an awi duh lo va. Kum 10 hnuah a nihna tak sawi chhuah a ni a, MNF-ho chuan an awi duh loh kha an sawifiah ve a lo ngai ta a; an pu timualpho tawk lekin an rawn sawifiah leh lawi a.

MNF-ho chuan an luak hnu an ei zauh zauh mai. State puitling an iai a, independence an ti a, state puitling policy-a neih duhtu tam takin an thih phah a. Tawrhna namen lo hnuah state puitling an pawm leh a, an luak an ei a. Tunah hmana an sawisel kha an ei leh mek a ni. Eptu lamin an luak hnu an barh a, an ei a ngai a, tui an tih loh hmel hle a ni. An sawi mekte chu an phuahchawp te, an mumang te, an ngaihtuahna te, an dil mek te, an la dil tur te a tam ang tih a rinawm.

(THE AIZAWL POST – Article)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy