Phullen leh a chhehvel tan Aizawl panna kawngpui, Phullen khawchhung ami chu a tlakhniam vangin lirthei tan zawh ngam a ni lo.
Zirtawpni leh Inrinnia ruahsur vangin Phullen tualchhungah leimin a awm nual a. Chhiatna nasa ber chu kawngpui pawimawh, Diakkawn tawntirh kawngpui metre 40 vela thui tlahniam chu a ni.
Phullen VCP Vanzairemmawia sawi danin, kawngthlang metre 10 vela hlaah tlahniamin, kawng hi a chhe nasa hle a, lirthei eng chi mah a kal theih rih loh. A chhak lawk, metre 10 velah Phullen Presbyterian Kohhran biak in a awm a, biak in varanda sir lungrem bul vel a khi a ni.
He biak in hi cheng nuai 50 vel senga sak thar niin an la zo fel lo nghe nghe nia thu dawn a ni. Lei tlahniam lai hi a chet belh chuan biak in hi a nghawng rin a ni.
He kawngpui hi Phullen to Aizawl kalkawng PWD main road niin, Phullen leh a chhehvel khuaten Aizawl an kalna kawngpui ber, bungrua engkim Aizawl lam atanga an lakluhna a ni tih an VCP hian a sawi a. Tunah hian tualchhung inkalpawhna, Diakkawn -Farkawn- Ar Farm veng lam kawng, zau vak lo chu Aizawl lama nen inkalpawhnan hman hrih a ni.
He lei tlahniam hi Inrinni khan Phullen VCP hoin khawtlang hruaituten an enfiah a. Lei hi la che zel thei a nih avangin eng ang takin nge an khawtlang a nghawng dawn tih ngaihtuah thiam har an tih thu an sawi a ni.
Helai hmun hi kum 2015 khan nasa vak loin a tlahniam tawh a, hei hi sia thain hnawh mar leh a ni a. Tunah nasa zawkin a tlahniam ta a ni.
(THE AIZAWL POST – Tualchhung)
Full>> ePaper Subscribe
