Sawrkar hnathawk, kum dik tak aia inziak naupang, pension hun kum 60 an tlin tawh hnu pawha sawrkar hna la thawk chhunzawm reng thei, mahse chu chu duh lova kum dik taka pension-a chhuak ta hi Mizoram sawrkar hnuaia sawrkar hnathawk mi 70 chuang an awm tawh niin Accounts& Treasury-a thawk pakhat chuan a sawi a.
Heng sawrkar hnathawk ‘mahni kum dik tak aia inziak naupang zawk’ kan tihte hi, sawrkar hna an thawh dawna inziak naupang chawp ni lovin, tunhmaa matric exam dawna form fill up atanga lo intan daih tawh a ni a. Matric certificate-a kum zat inziak kha a hnu lama document atana rin zui reng tawh tur a nih avangin, sawrkar hna an lo thawk a nih pawha an thawh rei theih nana inziak naupang an ni thin awm e. Tun hnuah hian mi tam tak chuan, khatih hun laia inziah naupan kha anmahni thua ti ni lovin, an zirtirtuten an ruahmansak thin niin an sawi a, sikul thenkhata matric pass chhuakte kha piankum inang an awm fur thin nia sawi a ni thin.
Hetiang hi tun hmaa lo practice thin dan kha a nih vangin, chhungkaw pakhat atanga unau pahnih pathum sawrkar hnathawk awmnaah, a naupang zawkin a u zawk pension khalh ta te pawh an awm thei a ni awm e.
Eirukna a hluar em em chhan pawh hi kha thil practice khan ‘diklo’ pawmzamna hi a hring chhuak ta zel ni ngei tur a ni a. Mahse, tunah chuan mahni inthiamlohna nei an lo pung zel a, dik taka thil tih duhna a lo piang chho mek niin a lang a. Hei hian rah tha tak chhuah chho zel se a duhawm takzet a ni.
Tun hnuah hi chuan, zirlaite an advance tawh a, qualification-in a tlin tawh si, mahse kumin a la tlin loh avanga inziah upat ngaih phah tlat zawkna te pawh a awm tawh a ni awm e.
A thuhrimin, document kher lovah pawh, Mizote hian kum zat sawi emaw, ziah lan emaw hi engatinge kan hreh em em thin tih hi zawhna pawimawh tak a ni. Hei hi mahni inrintawklohna rah a ni thei ang em? Zirbing mite hian a chhan leh vang zawngin a tihreh (solution) dan hi hmuhchhuah thuai a pawimawh dawn a ni.
Pian kum dik loa inziak
