Pianphunga rual ban lo chungin
a thlawnin thisen vawi 126 pe ta
Murgan Nagar Mumbai-a cheng Prakash M Nadar (50) chu Mizorama a thlawna thisen pe turin a rawn kal a, January 6 chhun khan Synod Hospital Blood Bank-ah thisen a pe. Association for Voluntary Blood Donation (AVBD) Mizoram hruaitute’n an tawiawm.
Prakash Nadar hi pianphunga rualbanlo (90% disable), wheelchair hmang a ni a, India rama state leh union territory tinah a thlawnin thisen pek a tum. Mizorama a rawn kal hma hian India rama state 24 leh UT 5-ah thisen vawi 125 a pe tawh. Synod Hospital-a a pek hi a vawi 126-na leh state/UT 30-a a pekna a ni.
Prakash chuan mite nunna chhanna atan thisen pe turin mitin a sawm tih a sawi a. A taksaa rual a ban phak loh dan chu zaa 90 a ni tih sawiin, “Kei pawhin ka pek theih chuan i pek theih lohna tur a awm lo. Ka tum ber chu, thisen dawn tur neih loh vangin mi tumah an thi tur a ni lo, tih a ni. Kan tanrual chuan thisen dawn tur neih loh vanga thihna thleng thin kan tibo thei dawn a ni,” a ti.
Aizawla thisen a pekna tura buaipuitu AVBD Mizoram chungah a lawm tih a sawi a; taksa lamah harsatna lian tak a nei chunga Mizorama thisen a pe thei chu a lawm thu leh, a thil tih chuan Mizoram mipui, a bikin thalaiteah chona leh phurna a pek ngei a beisei tih a sawi bawk.
Prakash M Nadar hi khawvel huapa infiamna lama pianphunga rualbanlote intihsiakna hrang hrangah tel tawhin, lawmman engemawzat a la tawh a; India ram leh khawvel huapa chawimawina thahnem tak dawng tawh a ni.
Pianphunga rual ban lo chungin a thlawnin thisen vawi 126 pe ta
