Daily Newspaper

PIANPUI TAWNG HLUT

40

-Vidpuia Hrahsel

Kan tawng chungchang ziah dik loh leh hawrawp kim loa ziah te, tawng hman dikloh chungchang inzirtir kan ngaih fo chhan hi eng vang nge ni ang le? Hnam naupang tak kan la nih vang em ni le. Khawvel han thlir ila, mahni hnam chin than leh nunphung chawisang hmasa a, tawng hlut apiang te hi hnam ding chhuak an ni thin. Keini erawh chuanin kan tawng kan ziak kim lo fo va, kan tawng aiah saptawng kan zep tel fo va, loh theih loh a hman ngai chu a awm thin tho e. Mahse tun ang renga kan kal reng chuan engtikah emaw kan tawng hian hmasawn aiin boralna lamtluang a zawh zawk thei. A la tlai lova, nang leh kei hi kan tawng hlut turin kan chak tawk a, kan kovah a in nghat a ni. Kan tawng ziah zawm leh zawm loh chungchangah hi chuan kei ngei pawh hian inzirna tur ka ngah em em a, mahse hawrawp kim lova chhut chingte ai chuan ka indah sâng fan mai.

Kan changkâng lutuk ta emaw tih mai turin, kan tawng hawrawp pawh kan ziak dik thei tawh lo a, hriat loh avanga ziak dik lote erawh ka dem hran lo. Hmasawn tum mihring kan ni vek a, kan tawng hmang hian eizawnna kawng kan zawh dawn lo tih pawh ka hria. Tu ate pawh hian Sap sikula luh kan inzirtir a, tumah indem thei bik kan awm lo ve, amaherawhchu kan pianpui tawng inzirtir hi chhungkaw tin ten kan mawhphurhna a ni tih hi i hre thar leh ang u. Zirna tha zawk duh avangin Sap sikul kal kan inzirtir a, Mizo Sikul chu thiam theihlohna emaw tiin kan iai thung. Hei tak erawh chu ka ziah tum a ni lo, khawvelin a ken tel ve reng, thiamna lei a ngaih tawh avangin leh kan tawng hmanga ei kan zawn dawn loh avangin Sap Sikulah nge nge chuan hmasawnna kawng kan zawh zawk niin kan hre vek. Amaherawhchu tunah erawh chuan hmana mi kha thlak danglamin a awm tawh a, Mizo sikul tam tak pawhin Sap sikula an zirlai ang an zir vek tawh. Kan tawng hi zirna inah chuan kan zir ngei e, amaherawhchu subject pakhat ve mai a nih avangin, a zawng zawng zirtir theih a ni lo, kha sikul kha sap sikul (English Medium) a nih miau avangin Mizo tawng a zirlai zirtir vek kha a remlohna chin a awm a ni. Hei vàng tak hian chhungkaw tinah kan tan tlân theuh a va ngai tak em.

Saptawng hmang dik lo leh thluk dik lo kan nuih ang bawk hian kan tawng hmang dik lote hi kan nuih ngam si lo. Nuih ngam turin kan tawng kan thiam tawk a ngai si a, thiam hle turin kan hnam tawng ngaihsan hi kan zir thar a pawimawh hle. Saptawng thumal dik lo taka ziakte hnung lamah kan nuih a, kan tawng dik loa ziakte kan en liam mai thin. Mahni hnam tawng pawh ziak dik thei lo chu kan innuih ngam a, kan inhrilh fiah ngam theih nan kan tawng hi kan hlut a va ngai em. Mahni hnam tawng aia hnamdang tawng i ngaihsan lai khan, i hnam hlutna i pawt hniam tial tial a, i ngaihsan zawk hnamdangte khan an dahsang ngai lo ang che. Loh theih loh a, tawng tualleng ang maia kan ngaih tawh, saptawng tam tak hman a ngaih chang hi chu a awm thin. Ni mahsela, mi thenkhat hian rem lo chung chung pawhin saptawng zeh tel hram hi kan tum thin a, changkanna emaw kan ti ni mai hian a lang. Kan tawnga ziah theih reng, saptawnga ziah kher hi hriatthiam awlsam zawk ah kan ngai a, kan tawng hawrawp kan ziak dik leh thei chuang silo lai tak hi kan inzirnna tur a ni.

Tu mai pawh hian neitu nih chang ila, kan hlut loh chuan tuin nge min hlutsak chuang ang le. Mizo tawnga thumal awm lo tam tak a awm, heng erawh hi chu tu pawhin kan hmang hian kan inhrethiam thei a, mahse kan tawng chhuahnaah emaw kan thuziah ah te kan tawng kan hman tam hian kan hlut telh telh a, kan chawisang zel dawn tihna a ni. Hawrawp kim lova kan ziah hian awmzia a nei lo, saptawng ziah kim loh kan hlauh ang hian kan tawng ziah dik loh hlauh hi kan zir thar a ngai. Khawi lo chhuahna apiangah kan tawng hman tam hi uar ila, ziah zawm kan thiam lo a nih pawhin ziah dik hram tum ila, kan tawng hian hma a sawn ngei ang. Mahni hnam ngaihsanna chang kan hriat loh hian, mahni kan inti mualpho a, mahni tawng pawh ziak dik thei lo, ‘aw leh o’ hman pawlh fo te, t aiah tr emaw thr hmang fo te, kan tawng hawrawpa awm miah lo ‘y’ kan hmang fo te hian kan tawng kan mausam fo thin a ni. Kan tawng aia hnamdang tawng kan dah hmasak zawk zel leh kan zep tel zel chuan, kan tawng hi a boral thei a ni. A hmangtu ten kan ziah dik a, kan hman tam zel hian kan tawng hi a nung reng ang. Hetianga kan tawng kan ziah kim loh zel chuan ngai a neih hi thil ni thei a ni.

Ram dang a, kan unauten kan hnam tawng hlut a pawimawhzia an hmuin an hrechiang tawh a, a bik takin America rama kan unaute hi fak an va phu tak em, pianpui tawng hlutzia an man thiam a, a boral mai loh nan, an thiamna leh an theihnate hmangin leh tunlai changkanna hmangin media hmangin hma an la a. Nau awih hla (nursery rhymes) thlengin kan hnam tawng ngeiin an phuah a, kan hlut deuh deuh a va ngai em. Keinin kan hlut loh chuan hnamdang hian min hlutsak dawn lo. Tu te mai pawh hian kan hnam tan a kan tih theih theuhah hian tan kan lak thar a, a theihna apianga kan tawng inzirtir zel hi kan man thiam a ngai a ni. Kan fate sap nau awih hla hmanga awih kher a ngai tawh lo, kan intodelh ta kan hnam tawng ngeiin nau awih hla a awm tawh. ABC te chu sikulah an lut ang a, an la thiam em em ang. Sikul an luh hma a kan tih theih chu, A Aw B zirtir te, mizo thawnthu hmanga inawih mut te hmang hian kan tawng humhalh hi a theih reng a ni. Keimahni theuh han inenfiah ila, tawng chungchangah hian kan fate tawng kan fah tam tawk em tih te, an ziah dik theih nan kan zirtir thin em tih te thleng hian. Kan faten an thlir leh an hriat tam a, kan hnam tawng ngei hla te, thawnthu te an hriat tam chuan kan tawng kan hlut zel dawn a, kan chawisang zel dawn a ni. Hengte hi kan ban phak maiah Mizo Society of America (MSA) ten min chhawp chhuah sak a, kan phone atangin Youtube-ah a en theih vek a ni.

Saptawng ziah kim loh zahthlak i tih ang bawk khan, i hnam tawng ziah kim loh zak la, a theihna apiangah i hnam tawng ngei hman tum la, i hnam i chawisang ang.Mahni hnam tawng thiam hi changkanna a ni a, hnamdang tawng thiam phei chu changkân leh zualna a ni. I hnam tawng i hlut a, a hun leh hmun a zir ang zela i insiamrem theih chuan mi changkang i ni ang. I hnam i humhalh theih nan i hnam tawng hman uar zel la, i hnam tawng ziak dik zel la, i hnamin hma a sawn ngei ang.

(THE AIZAWL POST – Article)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy